Bir neçə gün əvvəl Fransa Futbol Federasiyasının (FFF) prezidenti vəzifəsindən istefa verən Noel Le Qrenin işsizliyi çox da sürməyib. O, FİFA-nın Paris ofisinə rəhbər təyin olunub.

"Football-plus.az" xəbər verir ki, bu haqda FFF-nin İcraiyyə Komitəsinin (İK) üzvü Erik Borqini məlumat verib.

O, Le Qrenin FİFA-nın prezidenti Canni İnfantinonun qərarı ilə ali qurumun Paris ofisinə rəhbər təyin olunduğunu bildirib. Xatırladaq ki, 81 yaşlı funksioner 11 il FFF-nin prezidenti vəzifəsində işləyib.

Onun bu postdan istefasına çox ciddi ittihamlar səbəb olub. Paris prokurorluğu ona yönələn seksual xarakterli ittihamlarla bağlı təhqiqat aparır. Əvvəlcə futbol agenti Sonya Suid onu cinsi təcavüzdə ittiham etmişdi. FFF-də işləyən və milli komandanın bir sıra oyunçularının maraqlarını müdafiə edən menecer funksionerin 2014-cü ildə ona qarşı seksual təcavüzə əl atdığını iddia edir. Federasyanın bir sıra keçmiş qadın əməkdaşları da prezidentə qarşı eyni ittiham irəli sürüblər.