"Qarabağ" yaxşı performans göstərdi. "Köhlən atlar" yaxşı konsentrasiya olunmuşdu. Təmsilçimiz ilk hissədə aqressiv hücumlar qurdu, fasilədən sonra isə əks-hücumlara bel bağladı. Düşünürəm ki, 2-ci hissədə "Qarabağ" üçün əsas prioritet qapının toxunulmazlığını təmin etmək idi. Ona görə də rəqib daha çox topa nəzarət etməklə bizimkiləri bir qədər öz qapısına doğru sıxışdıra bildi. Həmçinin Qurban Qurbanovun yetirmələrində yorğunluq, gərginlik də hiss olunurdu. Düşünürəm ki, bunun əsas səbəbi müdafiə xəttinə rəqibin təzyiqinin artması və itkilərin olması ilə bağlı idi. Veşoviçin yoxluğu, Bədavinin arzulanan formada olmaması da özünü göstərdi. Amma sevindirici haldı ki, komandanın arxa xəttində yeni sima - Mateus Silva var. O, "Olimpiya"ya qarşı 15 dəqiqə oynadı. Düşünürəm ki, yeni transferin "Qarabağ"a çox faydası olacaq. "Qarabağ" cavab görüşünə bir qədər rahat çıxacaq. Amma arxayınlaşmaq olmaz. Rəqibin həm "Qalatasaray"la cavab, həm də təmsilçimizə qarşı nümayiş etdirdiyi 2-ci hissədəki oyunu göz önünə gətirmək lazımdı. “Qarabağ” iki cəbhədə mübarizə apardığından böyük risk alacaq. Komanda əvvəlki illərdə iki heyət formalaşdırmışdısa və birini avrokuboklarda, digərini daxili çempionatda meydana buraxmaqla rəqiblərini üstələ bilirdisə, bu dəfə asan olmayacaq. Çünki premyer-liqamızın səviyyəsi müəyyən qədər artıb, komandalar daha aqressiv və inadkar olub. Elə Ağdam təmsilçisinin son çempionat oyununda "Araz-Naxçıvan"a necə çətinliklə qalib gəldiyini xatırlamaq kifayət edir. Həmçinin "köhlən atlar"ın əsas rəqibləri "Sabah", "Zirə", "Neftçi" də yetərincə güclənib. Qurban Qurbanovu və yetirmələrini hər iki cəbhədə gərgin mübarizə gözləyir. "Qarabağ"a qarşıdakı oyunlarda uğurlar  arzulayıram". 

"Bir komanda Avropa Liqasının pley-offuna  qədər gəlib çıxıbsa, deməli, yetərincə güclüdü. "Qarabağ" səfərdə qapısını toxunulmaz saxlamaqla iki qol vurub qalib gəldi. Amma Sloveniya təmsilçisinin də sona qədər necə mübarizə apardığını gördük. "Olimpiya" fasilədən sonra üstünlüyü ələ almağı bacardı. Şükürlər olsun ki, Ağdam təmsilçisi bütün gücünü meydanda qoymaqla vətənə zəfərlə döndü. Düşünürəm ki, "köhlən atlar" rəqibi ciddi təhlil etdiyinə, avrokubok təcrübəsinə və qitəmiqyaslı yarışlarda yeganə təmsilçimiz olduğunu dərk etdiyinə görə uğur qazandı. Hesab edirəm ki, cütün taleyi böyük ölçüdə həll olunub. "Qarabağ" qeyri-sabit çıxış edən komanda deyil ki, üstünlüyünü əldən verə. Amma bu o demək deyil ki, Bakıda "köhlən atlar" əlini-qolunu sallayaraq meydana çıxacaq. Xeyr! "Olimpiya" Azərbaycana yaxşı nəticə qazanmaq üçün gələcək və döyüşəcək. Odu ki, rəqibin rahat oynamasına imkan verməyərək üstünlüyümüzü qorumaq və bir qədər də artırmaq lazımdı. Hamımız "Qarabağ"ın uğuruna sevinir, daha da uğurla irəliləyəcəyinə inanırıq".