“Fürsətdən istifadə edib “Qarabağ”ı təbrik edirəm. İlk oyun üçün 1 qollu qələbə pis nəticə deyil. Təbii ki, penalti düzgün yerinə yetirilsəydi və hesab 2:0 olsaydı, daha yaxşı olardı. Açığı, komanda ilk dəqiqələrdə gözləntilərə uyğun oynamadı. Yəqin çox həyəcanlıydılar. Rəqib daha fəal idi və qol vurmaq üçün tələsirdi. “Gent” ilk hissədə ardıcıl təhlükəli vəziyyətlər yaratdı. Təmsilçimiz ikinci hissədə hücuma daha dəqiq kökləndi. Cəsarətli ötürmələr, qol epizodları və rəqibi sıxışdırmaq cəhdlərinin sayı artdı. “Gent” son 45 dəqiqədə qapısı önündə mübarizə apardı. “Qarabağ” əzmkarlıq sayəsində rəqib qapısına yol tapa bildi. Cavab matçını da səbirsizliklə gözləyirik. Ümid edirəm ki, rəqib çətinlik yaradan sıx müdafiə sistemindən istifadə etməyəcək, açıq futbola üstünlük verəcək. Bu komandamızın qələbəsini asanlaşdırar. “Qarabağ”ın yeni transferlərini də gördük. Çox fəal və perspektivlidilər, komandanın gücünə güc qatacaqlar. “Qarabağ”dan daha böyük uğurlar gözləyə bilərik”.