“Renn”in hücumçusu Jeremi Dokyu “Mançester Siti”yə keçməyə yaxındı. İngiltərənin son çempionunu isə bir oyunçu tərk etmək üzrədi.

"Football-plus.az" xəbər verir ki, insayder Fabritsio Romanonun yaydığı məlumata görə, MS bu transfer üçün 60 milyon avroya Fransa klubu ilə şifahi razılığa gəlib. Transferin bu həftənin sonunda rəsmiləşəcəyi gözlənilir. Qeyd edək ki, 21 yaşlı belçikalının “Siti” ilə şəxsi müqaviləsinin şərtlərini razılaşdırdığı daha əvvəl bildirilmişdi.

Bu arada Bernardo Silva MS ilə yenidən anlaşıb. Portuqaliyalı futbolçunun müqaviləsinin müddəti 2026-cı ilin yayınadək uzadılıb. Komandada 2017-ci ildən oynayan yarımmüdafiəçi mavi formada meydana çıxdığı 308 oyunda 55 qol vurub.

Yeri gəlmişkən, “Barselona” heyətini gücləndirmək üzərində işləməyə davam edir və xüsusilə MS-dən Joao Kanselonu transfer etmək istəyir. “Mundo Deportivo” qəzetinin məlumatına görə, “Barselona”nın maliyyə çətinliyi var. Buna görə də İspaniya klubu portuqaliyalı oyunçudan bir qədər az maaşa razılaşmağı və ya “Siti”dən onun maaşının bir hissəsini ödəməsini xahiş edir. 29 yaşlı müdafiəçi ötən mövsüm 47 oyun keçirib, 3 qol vurub və 11 məhsuldar ötürmə edib.

Onu da qeyd edək ki, “Barselona” maliyyə problemləri səbəbindən İqnasi Penya, Markos Alonso və İnyiqo Martineslə yeni müqavilələri La Liqada qeydiyyatdan keçirə bilmir.