“Barselona”nı bu yay növbəti oyunçu tərk edib. Frank Kessye Asiyaya yollanacaq.

“Football-plus.az” xəbər verir ki, Fabritsio Romanonun yaydığı məlumata görə, “Əh-Əhli” ilə “Barselona” arasında aparılan danışıqlar müsbət nəticələnib. Tərəflər keçidlə bağlı şifahi razılığa gəlib. Tanınmış insayder 26 yaşlı yarımmüdafiəçinin Səudiyyə Ərəbistanı klubuna 15 milyon avroya satılacağını da bildirib. Frankın yeni klubu ilə razılaşdırılan müqaviləsinin müddəti 2026-cı ilin yayına qədər nəzərdə tutulub.

O, “Barselona”da 2022-ci ildən çıxış edir. Frank son mövsümdə bu komandanın formasında meydana çıxdığı 43 matçda 3 qolun və 3 məhsuldar ötürmənin müəllifi olub.

İspaniya klubunu Kleman Lanqle də tərk edə bilər. Maraqlıdı ki, onun da Səudiyyə Ərəbistanında top qovmaq şansı var. 28 yaşlı fransalı müdafiəçinin xidmətində maraqlı olan “Əl-Hilal”ın nümayəndələri artıq “Barselona” ilə danışıqlara başlayıblar. Ötən mövsümü icarə qaydası ilə “Tottenhem”də keçirən Lanqle kataloniyalıların formasını 2018-ci ildən geyir.
Yeri gəlmişkən, Joao Kanselo yenidən İspaniyada çıxış edə bilər. Portuqaliyalı futbolçu “Barselona” ilə razılığa gəlib. İspaniya klubu bundan sonra “Mançester Siti” ilə danışıqlarda qarşı tərəflə anlaşmağa çalışacaq. Kanselo MS-yə 2019-cu ildən məxsusdu. O, ötən mövsümün ikinci dövrəsini icarə qaydası ilə “Bavariya”da keçirib. 29 yaşlı müdafiəçinin 2014-18-ci illərdə İspaniyada - “Valensiya”da çıxış etdiyini xatırladaq.