Deyəsən, Kərim Benzemanın Səudiyyə Ərəbistanında işləri qaydasında getmir.

"Football-plus.az" xəbər verir ki, bilindiyi kimi, iyunun əvvəllərində o, uzun illər şərəfini qoruduğu “Real”dan ayrılaraq “Əl-İttihad”a transfer olunmuşdu. “Qızıl top”un son qalibi statusunda olan məşhur forvard ərəb ölkələrinin Çempionlar Liqası turnirində keçirdiyi ilk 3 oyunda 3 qol vurmuşdu. Amma bu turnirin 1/4 finalında “Əl-İttihad” “Əl-Hilal”a uduzaraq mübarizəni dayandırmalı olmuş, Benzema isə həmin qarşılaşmada penaltini boşa vermişdi. Ciddə şəhərini təmsil edən bu klub Səudiyyə Ərəbistanı çempionatına yaxşı start verib və ilk 2 turda maksimum xal toplayıb. Benzema hər iki oyunda 90 dəqiqə meydanda olsa da, hələ ki bu turnirdə qol hesabını aça bilməyib. Bu arada “Əşərq Əl-Əsvət” nəşrinin yazdığına inansaq, 35 yaşlı hücumçunun “Əl-İttihad”ın baş məşqçisi Nunu Eşpiritu Santu ilə münasibətləri ciddi şəkildə korlanıb. Bu nəşrin yazdığına inansaq, təcrübəli mütəxəssis növbəti oyunlarda məşhur futbolçunu start heyətində meydana buraxmaq istəmir və bunun bir neçə səbəbi var. Ümumiyyətlə, Santu Benzemanın oyun tərzini bəyənmir və ilk gündən bu transferə qarşı imiş. Onun fikrincə, fransalının oyun keyfiyyətləri onun komandasının tələblərinə cavab vermir və ona görə də futbolçu “Əl-İttifaq”a ciddi fayda verə bilmir. Santu Benzemanın hələ də daxili çempionatda qol hesabını aça bilməməsini məhz bununla əlaqələndirir. Benzema artıq bu mövzu ilə bağlı rəhbərliklə söhbət edərək narahatlığını dilə gətirib. O, konkret baş məşqçinin onunla qeyri-peşəkar şəkildə davranmasından gileylənib. Bu ikilinin münasibətləri həm də kapitan seçimi üzündən korlanıb. Benzema düşünürdü ki, həm ulduz statusunda olması, həm də ən yüksək səviyyədə böyük təcrübəyə malik olması üzündən kapitan sarğısı ona həvalə ediləcək. Amma 49 yaşlı Santu kapitanlığı “Real”ın sabiq üzvünə verməkdən imtina etdi. 1-ci kapitan 2018-dən klubun şərəfini qoruyan braziliyalı Romarinyo, 2-ci kapitan isə 29 yaşlı yerli müdafiəçi Ahmed Şarahili seçildi. Hətta məşqçi ilə oyunçu arasındakı mübahisə o qədər ciddiləşib ki, Benzema “Əl-İttihad”ın son məşqində iştirak etməyib! Çünki klubun rəsmi səhifələrində son məşqdən çəkilən görüntülərdə yalnız Benzema yoxdu. İki turdan sonra daha yaxşı top fərqinə malik olduğu üçün turnir cədvəlinə başçılıq edən “Əl-İttihad” növbəti oyununu artıq bu gün 3-cü tur çərçivəsində səfərdə “Əl-Riyad”a qarşı keçirəcək.