Səudiyyə Ərəbistanının futboluna rəhbərlik edənlər, deyəsən, dünya futbolunun qəsdinə durub.
“Football-plus.az” xəbər verir ki, harda bir ulduz varsa, önünə kisə-kisə pul atır və aparırlar. Hazırda Kilian Mbappe, Marko Verratti, Aleksandar Mitroviç, Fabinyo, David De Xea, Hakim Ziyeş və Pol Poqbanın da bu ölkəyə mümkün transferi ətrafında söz-söhbət gedir. Amma indiyə qədər də bir çox önəmli keçid baş tutub.

КRİŞTİANO RONALDO
Yaş: 38
Vətəndaşlıq: Portuqaliya
Mövqe: hücumçu
Əvvəlki klubu: “Mançester Yunayted”
Yeni klubu: “Əl-Nəssr” (ötən mövsümdə 2-ci yer)
Transfer məbləği: pulsuz
Səudiyyə Ərəbistanı futbolunun yeni üzü və ulduz axını zəncirini başladan adam. Kriştiano ildə 200 milyon dollar əməkhaqqı nəzərdə tutan başgicəlləndirici müqaviləyə imza atmaqla hələ qışda “Əl-Nəssr”ə keçdi. Düzdü, portuqaliyalı yarım mövsüm ərzində yeni komandası ilə heç nə qazanmadı. Ancaq hər şey irəlidədi.
KƏRİM BENZEMA
Yaş: 35
Vətəndaşlıq: Fransa
Mövqe: hücumçu
Əvvəlki klubu: “Real”
Yeni klubu: “Əl-İttihad” (1-ci yer)
Transfer məbləği: pulsuz
“Qızıl top”un son qalibi Səudiyyə Ərəbistanına köçməklə çoxlarını təəccübləndirdi, axı onun “Real”la müqavilə müddətini uzadacağı və Çempionlar Liqasında qollar vurmağa davam edəcəyi gözlənilirdi. Ancaq “Əl-İttihad” 35 yaşlı fransalıya Ronaldo ilə bərabər müqavilə rəqəmləri təklif etdi, odu ki, Kərim Səudiyyə Ərəbistanının çempionuna “yox” deyə bilmədi.
NQOLO KANTE
Yaş: 32
Vətəndaşlıq: Fransa
Mövqe: yarımmüdafiəçi
Əvvəlki klubu: “Çelsi”
Yeni klubu: “Əl-İttihad” (1-ci yer)
Transfer məbləği: pulsuz
Benzema ilə yanaşı, daha bir məşhur fransalı futbolçu “Əl-İttihad”la müqavilə bağladı. Kante sağlıq durumu ilə bağlı problem üzündən, demək olar ki, ötən mövsümü tam boşa verib. “Çelsi” isə xavbekin müqavilə müddətini indikindən də yaxşı şərtlər altında uzatmaq eşqi ilə alışıb-yanmadığından, dünya çempionu azad agent kimi Ciddəyə yollandı.
MARSELO BROZOVİÇ
Yaş: 30
Vətəndaşlıq: Xorvatiya
Mövqe: yarımmüdafiəçi
Əvvəlki klubu: “İnter”
Yeni klubu: “Əl-Nəssr” (2-ci yer)
Transfer məbləği: 18 milyon avro
Hələ yazda Çempionlar Liqasının finalçısının Serxio Busketsin yerinə “Barselona”ya keçəcəyi deyilirdi, ancaq Kriştiano Ronaldonun klubunun dəlilləri daha inandırıcı oldu: Brozoviç “Əl-Nəssr”ə, İlkay Gündoğan isə “Barselona”ya yollandı.