"Çoxu ilə razıyam ki, "Sabah"dan gözlənilən oyun bu deyildi. Murad Musayevin komandası daha fərqli çıxış etsə, istədiyini ala bilərdi. Digər tərəfdən, "Partizan" da fərqli çıxış etdi. Adətən, cavab görüşündə 2 top fərqi ilə geridə olan tərəf daha dinamik oynayır. Ardıcıl hücum cəhdləri ilə qol epizodları yaratmağa çalışır. Amma serblər təmkinliydi. Səbrlə rəqibin səhv etməsini gözləyirdilər. Təəssüf ki, planları uğurlu oldu. Deyərdim ki, "Partizan" "Qarabağ"ın oyun tərzini nümayiş etdirdi. "Sabah" hücum futboluna üstünlük versəydi, rəqibini çəkindirə bilərdi.

İkinci və ən əsas məsələ komandanın ölkə çempionatındakı matçını təxirə salması idi. Düzdü, bu daha yaxşı oyun göstərmək üçün edilmişdi. Amma əks təsirini gördük. Futbolçular bir həftə məşq edib meydana çıxdı. Əslində "Sumqayıt"la oyunda isinsəydilər, meydanda daha dinamik komanda görəcəkdik. Murad Musayev yaxşı kollektiv formalaşdırıb. "Sabah"ın matçlarını izləyəndə görürük ki, ikinci yarıya qədər rəqibini "sındırır", daha sonra istədiyini edir. Bu dəfə bacarmadı. "Partizan"a təzyiq göstərə biləcək səviyyədə deyildilər. Bunun səbəbi də yenə deyirəm, bir həftə oyunsuz qalmaları idi. Ümumi qiymətləndirsək, komanda ilk avrokubok təcrübəsi üçün yaxşı çıxış etdi".