Son vaxtlar futbolçuların soyğunçuların qurbanı olması hallarına tez-tez rast gəlinir.

Football-plus.az xəbər verir ki, ''Atalanta''nın və Türkiyə yığmasının müdafiəçisi Merih Dəmiral da belə oyunçuların sırasına daxil olub. Hadisə ötən həftəsonu baş verib.

''Calciomercato''nun məlumatına görə ''Atalanta'' Milad bayramı ilə bağlı futbolçularına bir neçə günlük istirahət vermişdi. Merih də fürsətdən istifadə edərək ailəsi ilə birlikdə Türkiyəyə gəlmişdi. Hadisə də elə o, vətəninə qayıtdığı gün gecə saatlarında baş verib. Futbolçunu bir müddət təqib edən soyğunçular onun İtaliyada olmadığını bildikdən Berqamodakı villasına basqın ediblər. Onlar evin pəncərələrinin şüşələrini, eləcə də qapını qıraraq içəri daxil olublar. 3 nəfərdən ibarət olan dəstə evdən pullar, bahalı daş-qaş, eləcə də Merihlə həyat yoldaşına məxsus olan dəyərli əşyalar oğurlayaraq qaçıblar. İtaliya polisi həmin şəxslərin axtarışını davam etdirir.

Deyilənə görə, məşhur futbolçunun ailəsi bu hadisədən sonra İtaliyaya qayıtmağa tələsmir. Dəmiral artıq məşqləri bərpa etmək üçün “Atalanta”nın düşərgəsinə qoşulsa da, həyat yoldaşı onların yeni doğulmuş körpəsi ilə birlikdə hələ bir müddət də Türkiyədə yaşayacaq.

Xatırladaq ki, 24 yaşlı futbolçu ötən il albanəsilli isveçrəli model Haydi Luştaku ilə ailə həyatı qurmuş və bu cütün apreldə Ömər Kais adı verilən oğulları dünyaya göz açmışdı.