Türkiyə yığmasının müdafiəçisi Merih Dəmiralın bu yay hansı kluba keçəcəyi maraq doğurur.

Xatırladaq ki, müqavilə ilə ''Yuventus''a məxsus olan istedadlı futbolçu son mövsümü icarə əsasında ''Atalanta''da keçirmişdi. İnamlı təsir bağışlanmasına və iki dəfə ayın oyunçusu seçilməsinə baxmayaraq Berqamo təmsilçisi Merihə görə 28 milyon avro ödəmək istəmədi. İtaliya mətbuatının yazdığına inansaq, 24 yaşlı mərkəz müdafiəçisi karyerasını İngiltərədə davam etdirə bilər. Belə ki, ''Nyukasl''ın ona maraq göstərdiyi məlum olub. Ərəblərin himayəsinə keçdikdən sonra dünyanın ən varlı klubuna çevrilən ''Nyukasl''ın Dəmirala görə 40-50 milyon avro ödəməyə hazır olduğu deyilir. İngiltərə mətbuatının iddiasına görə isə Merihə ''Mançester Yunayted''Yunayted də maraq göstərir. ''Qırmızı şeytanlar'' Merihlə yanaşı Türkiyə yığmasının digər aparıcı üzvü Hakan Çalhanoğlunu da transfer etməyə çalışacaq. Amma ''Nyukasl''ın daha istəkli olduğu vurğulanılır. ''Transfermarkt''a inansaq, bu futbolçunun indiki dəyəri 30 milyon avrodu. Merih geridə qoyduğumuz mövsüm ''Atalanta''nın heyətində 42 rəsmi oyuna çıxaraq 2 qol, 3 məhsuldar ötürməlik performans sərgiləyib.