“Qəbələ” 2022/23 “futbol ili”ndə ən iddialı komandalar sırasında idi.

İlk “4-lük”də qərarlaşmağı bacaran əyalət təmsilçisi ölkə kubokunu da başı üzərində qaldırıb azarkeşlərinə əsl futbol bayramı yaşatmışdı. Məhz bu üzdən tərəfdarların yeni mövsümlə bağlı gözləntiləri artmışdı. Düzdü, komandanın ən etibarlı fanklubu “Red Black Army” qəzetimizə açıqlamalarında vəziyyəti anladıqlarını və çatışmazlıqların tezliklə aradan qaldırılacağına inandıqlarını dəfələrlə qeyd ediblər. Lakin reallıq odu ki, onlar belə, startın bu qədər uğursuz olacağını təxmin etmirdi. İndi sosial şəbəkələrdə, üstəlik klubun rəsmi hesablarında xeyli tənqid oxuyuruq. Görünür, azarkeşlər hələ də aparıcı futbolçuların komandadan ayrılmasını həzm edə bilmir. Yeni transferlər isə qətiyyən onları qane etmir. Çünki Konfrans Liqasının 1-ci təsnifat mərhələsində “Omoniya” (Cənubi Kipr) “Qəbələ”ni ümumilikdə 7:3 hesabı ilə məğlub etdi. Misli premyer-liqasının ilk iki turu da fiasko ilə nəticələndi: 0 xal, 7 cavabsız qol! Narazılıqları nəzərə alıb kritik durumla bağlı baş məşqçi Elmar Baxşıyevlə danışmaq istədik. Təəssüf ki, arzumuza çata bilmədik. Çünki çalışdırıcı “Araz-Naxçıvan”la matçdan sonra danışmaq istədi. Deyəsən, sözügedən oyunun 0:2 hesablı məğlubiyyətlə bitməsi mütəxəssisi fikrindən daşındırdı. Daha sonra kapitan Urfan Abbasova müraciət etdik. Bu dəfə də zənglərimiz cavabsız qaldı. Nəhayət, digər kapitan Asif Məmmədovla əlaqə yarada bildik. Futbolçu ilə söhbət zamanı başverənlər və bundan sonrakı planlar haqda məlumat aldıq.

- “Qəbələ” yeni mövsümdə 4 rəsmi matçda meydana çıxıb, lakin birində də qələbə qazana bilməyib. Hazırda komandanın vəziyyəti ilə Konfrans Liqası və ölkə kuboku hədəfləri arasında uçurum var. Azarkeşlər çox narahatdı...
- İnanın ki, klub daxilində hər kəs ən azı onlar qədər narahatdı. Düzdü, deyəcəyim səbəbləri daha öncə dəfələrlə açıqlamışıq. Lakin yenə deyirəm ki, heyət yenidən formalaşdırıldı. Yay fasiləsindən istədiyimiz kimi yararlana bilmədik. Bəzi futbolçular məşqlərə gec qoşuldu. Təlim-məşq toplanışları da, demək olar ki, faydasız alındı. Zaman az olduğundan tələsik oyunlar keçirdik. Üstəlik oyunçuların əksəriyyətinin yaşadığı problemlər planlarımızı gecikdirdi. Mövsümə nə fiziki, nə də psixoloji cəhətdən tam hazırıq.

- Araşdırmalarımız zamanı bəlli olur ki, yeni transferlər o qədər də uğursuz deyil. Karyeralarını qənaətbəxş saymaq olar. Amma nəticələr ürəkaçan deyil. Uyğunsuzluğun səbəbi nədi?
- Elədi ki var. Futbolçuların çoxu Azərbaycan premyer-liqasında ilk dəfə çıxış edirlər. Bu da öz mənfi təsirini göstərir. Birincisi, hər birinin özünəməxsus keyfiyyətləri, fərdi ustalığı var. Bunu danmaq olmaz. Lakin komanda ilə birlikdə yaxşı performans göstərə bilmirlər. Uyğunlaşmaları üçün xeyli vaxt lazımdı. Oyunları izləyərkən bu çatışmazlıqları görürük. İkincisi, vacib epizodlarda bir-birini anlaya bilmirlər. Fərdi bacarıqları hesabına bir yerə qədər gəlsələr də, həlledici məqamda yanlış addım atırlar. Halbuki bu baş verməsə, indi turnir cədvəlindəki yerimiz fərqli olacaqdı.

- “Qəbələ”nin baş meneceri Nail Kərimov ötən saylarımızdan birində ölkə kuboku və Konfrans Liqası hədəfləri haqda danışdı. Digər tərəfdən, Elmar Baxşıyev deyir ki, daha bir neçə futbolçuya ehtiyac var. İndiki durumu necə dəyərləndirirsiz? Bu açıqlamalar fonunda hədəflərə çatmaq real görünür?
- Əslində bu sualın cavabı şəraitdən asılı olaraq dəyişir. Hazırki vəziyyətə görə danışsam, indiki komanda ilə təbii ki, mümkünsüzdü. Daha dəqiq desəm, tarixi uğur qazanmaq üçün bizə ancaq möcüzə kömək olar. Digər premyer-liqa klublarının islahatları da göz qabağındadı. Qarşıda rəqabətli “futbol ili” var... Amma Elmar müəllimin dediyi kimi, yeni futbolçular gəlsə, vəziyyət dəyişəcək. O zaman daha iddialı danışa bilərik. Hədəflərimizə köklənə bilmək asanlaşar. İndi bir məğlubiyyətin zərbəsini həzm etməmiş digəri gəlirsə, hansısa yüksək göstəricidən söhbət gedə bilməz.

- Komandanın içində olan biri kimi Elmar Baxşıyevin fəaliyyəti haqda nə düşünürsüz? Sosial şəbəkələrdə baş məşqçini tənqid edənlərin sayının artdığını görürük. Halbuki ötən mövsümün sonunda çoxu onu əsas millimizin çalışdırıcısı postuna namizəd kimi dəyərləndirirdi...
- Elmar müəllim məsuliyyətli mütəxəssisdi. Ən kiçik çatışmazlığı, uğursuzluğu həzm etmək istəmir. Həmişə daha yüksək nəticələr uğrunda mübarizə aparır. Başverənlərin səbəbkarı məhz o olmasa da, məsuliyyət onun üzərindədi. Çalışır ki, ən qısa zamanda vəziyyətdən çıxış yolunu tapsın. Məşqlərimiz davam edir. Sadəcə, daha çox zaman lazımdı ki, “relsə düşək”.

- Mən “Qəbələ” – “Omoniya” matçını tribunadan izlədim. Sözün düzü, “qırmızı-qaralar”ın yay fasiləsindən sonra ilk matçdakı performansı gözlədiyimdən daha yaxşı oldu. Az qala kiprlilərə qalib gələcəkdiz. Amma səfər matçı arzuları puç etdi. Sanki komanda ən yaxşı formasını bir anda itirdi. Buna nə səbəb oldu?
- Həmin gün stadionda hansısa jurnalist sonrakı matçlarla bağlı gözləntilərimi soruşsaydı, nikbin cavab verməyəcəkdim. Niyə? Çünki futbolçuların hazırlıq səviyyəsinin yaxşı olmadığından xəbərdar idim. Oyun tərzinin yüksək səviyyədə olmasının əsas səbəbi azarkeş dəstəyi idi. 2000-ə yaxın tərəfdar sona ana qədər bizi dəstəklədi. Yeni transferlərimiz həmin ab-havaya, hətta daha yaxşılarına öyrəşdiyi üçün rahat oynadı. Məncə, premyer-liqa matçlarına da o qədər azarkeş gəlsə, komanda həminki oyunu yenidən göstərə bilər. Təəssüf ki, futbolçular 300-500 azarkeş önündə oynamağa öyrəşməlidi...

- Qarşıda sizi “Sumqayıt”la matç gözləyir. “Gənclik şəhəri”nin təmsilçisi “Səbail”i məğlub etdi. “Dənizçilər” də öz növbəsində “Neftçi” ilə “sülh”ə razı oldu. Nə düşünürsüz? Növbəti oyundan sonra turnir cədvəlində “Qəbələ”nin adının önündə qələbə görəcəyik?
- Meydana qələbə üçün çıxacağıq. Durum yaxşı olmasa da, gündən-günə formalaşırıq. İnşallah, matç günündə qədər daha fərqli “Qəbələ” ola bilərik. Təslim olmağın tərəfdarı deyiləm. İnanıram ki, tezliklə əvvəlki gücümüzü bərpa edəcəyik. Elmar Baxşıyev də “Sumqayıt”ın ilk oyununu təhlil edib komandaya lazımi tapşırıqları verəcək. Əminəm ki, deyilənlər meydanda yerinə yetirilsə, zəfər bizimlə olacaq.

KƏNAN BAHADIR