"Red Black Army" qələbə gözləyir
"Qəbələ" avqustun 3-də Konfrans Liqasının 2-ci təsnifat mərhələsində səfərdə "Omoniya" ilə qarşılaşacaq. Dünən klubun idman direktoru Nail Kərimov "Futbol+"ə açıqlamasında cavab matçına azarkeşlərin aparılmayacağını dedi.
Görəsən, bu məqam futbolçuların performansına necə təsir edəcək? Tərəfdarlar matça aparılmamalarını necə qarşılayır? Ümumiyyətlə, onların cavab oyunundan gözləntiləri necədi?
Suallarımızı "Qəbələ"nin fanklubu "Red Black Army"nin təsisçilərindən Nəriman Təbrizə ünvanladıq. Onun "Football-plus.az" saytına söylədikləri:
"Klubun büdcə çatışmazlığının olması heç kimə sirr deyil. Buna görə qərarları həmişə anlayışla qarşılayırıq. Matç yaxın ölkələrdən birində olsaydı, 15-20 nəfər toplaşıb öz hesabımıza gedə bilərdik. Təəssüf ki, Kipr çox uzaqdı. Ümid edirəm ki, ordakı azərbaycanlılar "Qəbələ"yə dəstək olmaq üçün əlindən gələni edəcək. Düzdü, kiprlilərin türklərə qərəzli münasibəti var. İnşallah, Nikosiyada heç bir problem yaşanmaz. Hər halda, biz onlara Qəbələ səfərində qonaqpərvərlik göstərmişdik".
Nəriman cavab matçı ilə bağlı gözləntilərini də bizimlə bölüşdü:
"Həmişəki kimi, komandaya çox inanırıq. Hətta ev oyunundan əvvəl 40 faiz inam var idisə, indi 60-dı. Futbolçular göstərdi ki, uyğunlaşıblar və bu işi bacaracaqlar. "Omoniya" da keçilməyəcək rəqib deyil. "Qəbələ"yə güvənirik".
KƏNAN BAHADIR
Digər xəbərlər
