İki əzəli və barışmaz rəqib ''Fənərbaxça'' ilə ''Qalatasaray'' arasında gərginlik davam edir. Zəlzələ zamanı bütün böyük klublar və onların fanatları birləşməyi bacarmışdılar. Amma zaman hər şeyi əvvəlki yerinə qaytardı və bu dostluğun yalançı olduğunu üzə çıxardı.

Zəlzələ unudulan kimi yenə əzəli rəqiblər hakimlikdən gileylənməyə, bir-birilərinə atmacalar atmağa başladılar. İndi də ''Fənərbaxça'' ''Qalatasaray''ın rəsmisi Ərdən Timurdan şikayət edib.

Məsələ burasındadı ki, ''Cim-Bom''un idarə heyətinin üzvü və başqan vəkili olan Timur martın 29-da ''TV100'' kanalının canlı yayınının qonağı olarkən Nikolo Zanyolo ilə bağlı maraqlı etirafı ilə gündəmə gəlmişdi. O, ''Fənər''in italiyalı futbolçuya irəli sürdüyü təklifi nöqtə-vergülünə qədər açıqlamışdı.

Timur ''sarı-lacivərdlilər''in Zanyoloya görə ''Roma''ya 16 milyon avro, futbolçunun özünə isə maaşdan əlavə 2 milyon avro bonus, eləcə də hər 10 qola görə əlavə 300 min avro təklif etdiyini bildirmişdi. Yəni klub təxminən 21 milyon avroluq yükün altına girməyə hazır idi. Həmin an canlı yayında Timurun gətirdiyi sənədlər ekranda göstərilərkən orda ''Fənər''in emblemi də açıq-aydın görünmüşdü.

Bilindiyi kimi Zanyolo sonda ''Fənər''lə müqayisədə daha az pul təklif edən ''Qalatasaray''a üstünlük verdi. İndi ''Fənər'' kluba aid gizli ticarət məlumatlarını ictimaiyyətə açıqladığı üçün Timurdan həm FİFA-ya, həm də prokurorluğa şikayət edib. FİFA-nın etika komitəsinin 17-ci maddəsinə əsasən Timura cəza verilə bilər.