“Qalatasaray” transferdən doymur.

"Football-plus.az" xəbər verir ki, zatən güclü və Çempionlar Liqasının qrup mərhələsində layiqincə mübarizə apara biləcək bir heyət quran “Cim-Bom” bununla kifayətlənmək istəmir. Uilfrid Zaha transferində “Fənərbaxça”nı üstələməklə diqqəti çəkən “Qalatasaray” yenə əzəli rəqibinə keçməyə yaxın olan bir futbolçu ilə anlaşıb. Söhbət “Şaxtyor”un braziliyalı vingeri Tetedən gedir. Əslində tam adı Mateus Kardoso Lemos Martins olan 23 yaşlı futbolçunun donetsklilərlə müqavilə müddəti davam edir, onun vaxtı dekabrın 31-də başa çatacaq. Amma bilindiyi kimi, FİFA Rusiya və Ukrayna klublarında oynayan futbolçulara müqaviləni istədikləri vaxt ləğv etmək hüququ verib. Tete də bundan yararlanmaq niyyətindədi. Ən birinci “Beşiktaş”ın maraq dairəsinə düşən istedadlı futbolçu sonradan “Fənərbaxça” ilə danışıqlara başladı. Hətta 3 gün əvvələ qədər onun artıq “Fənər”ə keçməyin biraddımlığında olduğu iddia edilirdi. Amma srağagün gözlənilmədən Tetenin “Qalatasaray”la anlaşdığı haqda xəbərlər çıxdı. Hadisələrin belə axarından sonra “Fənər” Zaha məsələsində olduğu kimi tənqid obyektinə çevrilməmək və dilə-dişə düşməmək üçün məcburi bir bəyanat yaydı. Orda qeyd olundu ki, adı çəkilən futbolçu meneceri tərəfindən məhz “Fənərbaxça”ya məsləhət görülüb. Yəni ən birinci Tetenin meneceri özü klubla əlaqə saxlayıb. Amma danışıqlar zamanı tərəflər maddi məsələlərdə anlaşa bilməyiblər. Bu üzdən danışıqlar yekunlaşdırılıb. Əvəzində “Qalatasaray”ın transfer sehrbazı – vitse-prezident Ərdən Timur Bodrumdakı otellərdən birində gizlicə Tetenin meneceri ilə görüəşər anlaşma əldə edib. İndiki dəyəri 25 milyon avro olan “sambaçı”ya görə “Qalatasaray” heç bir təzminat ödəməyəcək. Tete ilə 4 illik müqavilə imzalanacaq. Onun illik maaşı 2,5 milyon avro civarında olacaq. Bundan başqa, futbolçuya 3,5 milyon avro imza parası ödəniləcək. “Qremio”nun yetirməsi olan və 2019-da 15 milyon avroya “Şaxtyor”a transfer olunan Tete son iki mövsümü icarə əsasında “Lion” və “Lester”də keçirmişdi. Bu klublarda 44 rəsmi oyuna 9 qol vuran braziliyalı “Şaxtyor”da isə 108 rəsmi oyunda 31 qol, 15 məhsuldar ötürməlik performans sərgiləyib.

Bu arada Tetenin transferindən sonra Nikolo Zanyolonun “Qalatasaray”dan ayrıla biləcəyi ilə bağlı xəbərlər peyda olub. Çünki Tete də solaxaydı, demək olar, Zanyolonun mövqeyində oynayır. Şayiələrə inansaq, italiyalı ulduzun “Jalgiris” və “Olimpiya”ya qarşı son iki matçda oynamaması da əslində zədə ilə yox, transfer durumu ilə bağlıdı. “Cim-Bom” Zanyolonu 30 milyon avrodan aşağı qiymətə satmaq niyyətində deyil. Bu futbolçuya “Yuventus” və Səudiyyə Ərəbistanı klubları ciddi maraq göstərir. Bu satış reallaşsa, “Qalatasaray”ın heyətə dünya ulduzlarını cəlb etmək planı da baş tuta bilər. Deyilənə görə, Ərdən Timurun ən böyük arzusu Joao Felişlə Antuan Qrizmanndan birini “Qalatasaray”a qazandırmaqdı! Bundan başqa, “Real”ın əfsanəsi, hazırda azad agent statusuna malik Serxio Ramosla bağlı da hər an sürpriz yaşana bilər. Ramosa ABŞ-dan və Səudiyyə Ərəbistanından çox ciddi təkliflər var. Amma deyilənə görə, o, Avropada qalmağa üstünlük versə, ÇL amilinə görə məhz “Qalatasaray”ı seçəcək. Avropada Ramosa “sarı-qırmızılar”dan başqa maraq göstərən klub yoxdu.