Oyuna maraq o qədər böyük deyildi. Sanki Bakı derbisi yox, kəndlərarası çempionat matçlarından biri idi.

Azarkeş marağı baxımından belə idi. Meydanda isə əsl mübarizə gedirdi. İlk dəqiqələrdən hiss olunurdu ki, "Səbail" "Neftçi"yə asan təslim olmayacaq. Düzdü, hər iki komandada xaotiklik hiss olunurdu. Lakin ilk hissədə "dənizçilər" daha yaxşı təsir bağışlayırdı. Bu da əbəs deyildi. Diniyev meydana 7 legioner buraxmışdı. Onlar da özlərini həm baş məşqçiyə, həm də azarkeşlərə göstərməyə çalışırdılar. Görüşdə ilk qolu da qonaqların əcnəbiləri təşkil etdi. 34-cü dəqiqədə Valdemarın ara ötürməsini Nuno dəqiq zərbə ilə tamamladı. İlk yarı bu hesabla bitdi.

Fasilədən sonra Mutunun komandası daha hücumameyilli futbol sərgiləməyə başladı. Şahin Diniyev qələbə qazanmaq üçün hər yola əl atırdı. Hücum potensialı yüksək olan oyunçuları meydandan çıxararaq müdafiəyəmeyilli futbolçuları döyüşə atsa da, istəyi alınmadı. İkinci yarıda oyuna qoşulan Süleyman heç nədən Kenniyə qarşı qaydanı pozdu. Hakim tərəddüdsüz 11 metrlik cərimə zərbəsi təyin etdi. Zərərçəkən özü fərqlənərək hesabı bərabərləşdirdi. Oyunun sonlarında "Neftçi" hücuma atılsa da, fayda vermədi. Paytaxt derbisində tərəflər hərəyə 1 xalla kifayətləndi.

Gözdən qaçmadı
* Matçın keçirildiyi "Neftçi Arena"nın ot örtüyü bərbad durumda idi.
* “Səbail" hesabı açandan dərhal sonra Mutu Qara Qarayevi əsəbi formada səsləyərək nələrsə söylədi.
* Rəhman Hacıyev Şinyaşikinin əvəzinə meydana çıxan zaman 4-cü hakim buna imkan vermədi. Səbuhi Bayramov "Səbail"in oyunçularının əvəzetmələrindən sonra yarımmüdafiəçinin oyuna daxil olmasına icazə verdi.
* Eminin meydandan çıxan zaman kapitan sarğısını Rəhmana verməsi diqqəti çəkdi.
* 74-cü dəqiqədə "Səbail"in futbolçularından biri yerdə qaldı. Süleyman Əhmədov topu auta atan zaman "Səbail"in ehtiyat oyunçular skamyasından kimsə meydana su fırlatdı. Butulkanın Qaraya dəyməsi futbolçular arasında qalmaqalın yaşanmasına səbəb oldu. Millimizin üzvü skamyaya baxaraq "suyu içirlər eee, başa tullamırlar" deyərək əsəbləşdi. Bundan sonra Tamaş hadisə yerinə yaxınlaşaraq əli ilə "başınız işləyir?" işarəsini göstərdi. Qaranın daha da aqressivləşməsinin qarşısını isə Süleyman Əhmədov aldı.
* Penalti epizodu zamanı Qara Qarayev topu əlinə götürərək Kenni Sayefə verdi ki, zərbəni o vursun.

İLKİN SULTANLI