İlk dəqiqələrdən matçın gərgin keçəcəyi hiss olunurdu.

Azarkeşlər də çox olsaydı, deyə bilərdik ki, əsl derbi ab-havasında görüş izləyirik. Çoxları bu qarşılaşmada “Sabah”ın asan qələbə qazanacağını düşünürdü. Lakin start fitindən sonra “Səbail” hücuma atıldı.

Şahin Diniyevin komandasında Ağabala, Mazurek, Qomis xüsusi fəallıq göstərirdi. Onlar sürətli keçidlərlə “bayquşlar”ın müdafiəçilərinə problem yaşadırdı. Təsadüfi deyil ki, matçın 24-cü dəqiqəsində Masazır klubunun artıq üç futbolçusu sarı vərəqə ilə cəzalanmışdı. Bir qədər sonra isə “dənizçilər” hesabı açdı. Sağ cinahda topu ələ keçirən Qomis bir qədər irəlilədikdən sonra “dəri kürə”ni qapıdan keçirdi. Murad Musayev qol vurularkən çılğına döndü. O, daha çox Qomisi “bağlaya” bilmədəyi üçün Letiçə əsəbləşdi. Fasiləyə kimi “bayquşlar”ın hesabı bərabərləşdirmək cəhdləri boşa çıxdı.

İkinci hissəyə isə Masazır klubu daha istəkli başladı. “Tələbələr” hücumlar qurur, “dənizçilər” müdafiə olunurdu. Şahin Diniyevin komandası əks-hücumda “Sabah”ı yaxalamağa çalışırdı. Bu da 59-cu dəqiqədə fayda verdi. İrasabal Ağabalaya qarşı kobud oynayaraq meydandan qovuldu. Artıq “Səbail”in rahat qələbə qazanacağı gözlənilirdi. Lakin Murad Musayev üç əvəzetmə hesabına oyunun axarını dəyişmək istədi. 75-ci dəqiqədə karyerasında ilk dəfə sağ cinah müdafiəçisi kimi oynayan İlkin cərimə meydançasında Namiki kobudluqla dayandırdı. İnqilab Məmmədov isə penalti təyin etdi. Topun arxasına keçən Apeh hesabı bərabərləşdirdi.

Son 15 dəqiqə olduqca gərgin keçirdi. Gah “Səbail”, gah da “Sabah” qol vurmağa cəhd edirdi. Şahin Diniyev də son dəqiqələrdə sürətli futbolçularını meydana buraxdı. Əlavə olunan ilk dəqiqədə Ceyhun qola yaxın oldu. Onun zərbəsi dirəkdən döndü. “Səbail”in son hücum cəhdi isə qolla nəticələndi. Lyuyiç sol cinahda reyd edərək cərimə meydançasına ötürmə göndərdi. Özünü topa yetirən Zakpa isə qələbə qolunun müəllifi oldu. Beləliklə, gərgin keçən derbidə “Səbail” “Sabah”ı məğlub etməyi bacardı.

Gözdən qaçmadı

* Matç başlamamış Şahin Diniyev fikrə getmişdi. Mütəxəssis o qədər fikirliydi ki, səhvən “Sabah”ın ehtiyat oyunçular skamyasında dayanmışdı. Murad Musayev gələndən sonra Diniyev anladı ki, yerini dəyişməlidi.

* Murad Musayev İnqilab Məmmədovun bütün qərarlarına etiraz edirdi. Matçın 12-ci dəqiqəsinə kimi rusiyalı o qədər danışdı ki, sonda 4-cü hakim Səbuhi Bayramov mütəxəssisin köməkçilərindən birinə bunları söylədi: “Biriniz danışın da. Hamınız yerinizdən deyinirsiz. Murad Musayev də bir az sakit olsun. Ancaq boş-boş danışır”.

* 24-cü dəqiqəyə kimi “Sabah”ın üç futbolçusu sarı vərəqə ilə cəzalandı. Lakin “ASCO Arena”nın diktoru bunu elan etmədi.

* Birinci hissənin bitiminə 4 qalmış Səbuhi Bayramov ilk yarıya əlavə olunacaq 2 dəqiqəni elektron tabloda hazırladı.

* 59-cu dəqiqədə İrasabal qırmızı vərəqə alaraq meydanı tərk etdi. Buna bərk əsəbləşən Musayev referini təhqir edərək pencəyini yerə çırpdı.

* Ramazan ayı münasibəti ilə iftar vaxtı “Səbail” rəhbərliyi stadionda oruc olan insanlara yemək payladı.

* Diniyev “Səbail”in qələbə qolunun sevincini akademiyanın üzvləri ilə qeyd etdi.

* Matç bitən kimi Murad Musayev İnqilab Məmmədovun üzərinə şığıdı. Rusiyalı baş hakimə sərt şəkildə etiraz etdi. Bu səbəbdən də FİFA referisi ona “qırmızı” göstərdi.