Arenada ab-havanın möhtəşəm, havanın gözəl olması oyuna marağı daha da artırırdı. “Sabah”ın ideal “11-lik”lə meydana çıxması bakılıların görüşə ciddi yanaşdığından xəbər verirdi.

Şenol Günəş isə həm əsas, həm də müntəzəm meydana çıxmayan oyunçulardan ibarət heyətə güvənmişdi. Murad Musayevin komandası rəqibdən qorxmadığını ilk dəqiqələrdən göstərdi. Azarkeşlər yerini isitməmişdi ki, “Sabah” hesabı açdı. Kaşuk 3-cü dəqiqədə stadionu ayağa qaldırdı. “Qara qartal” qolun şokundan ayılmamış bakılılar yenə fərqləndi. Bu dəfə də səhnəyə ukraynalı ulduz çıxdı - 2:0. Bundan sonra İstanbul təmsilçisi toparlanmağa başladı. Düzdü, “Sabah” da tez-tez rəqibə çətin anlar yaşadırdı. Lakin ilk hissənin ortalarına doğru “Beşiktaş” üstünlüyü ələ aldı. 23-cü dəqiqədə Umut aşırma zərbə ilə fərqi azaltdı.

Qolda Aminlə Yusifin səhvini xüsusi qabartmaq lazımdı. Müdafiəçi rəqibin qarşısını kəsə bilmədi. Yusifin isə həmin vaxt qapıdan uzaqda olmasının səbəbi naməlum qaldı. Hissənin sonuna yaxın “Sabah” daha da fəallaşdı. “Tələbələr” hətta penalti vurmaq imkanı da qazandı. 40-cı dəqiqədə Velinton cərimə meydançasında Mikelsə qarşı qaydanı pozdu. Tural Qurbanov “nöqtə”ni göstərdi. Lakin zərərçəkən zərbəni dəqiq yerinə yetirə bilmədi. Psixoloji üstünlüyü ələ keçirən “ağ-qaralar” 45-ci dəqiqədə hesabı bərabərləşdirdi. Yenə Umut komandasına ümid verdi. Maksimin ötürməsini Türkiyə millisinin üzvü dəqiq zərbə ilə tamamladı.

Fasilədən sonra Günəş əsas heyət üzvlərini meydana buraxdı. Baş məşqçinin dəyişikliklərindən hiss olunurdu ki, qələbə qazanmaq istəyir. İkinci hissədə “Beşiktaş” daha basqılı oyun nümayiş etdirirdi. “Sabah” isə ehtiyatla müdafiə olunaraq əks-hücumlara bel bağlayırdı. 56-cı dəqiqədə Mikels yenə şansını qaçırdı. Almaniyalı vingerin zərbəsi dirəkdən döndü. Bir qədər sonra isə Tural Qurbanov penalti təyin etdi. Bu dəfə İrasabal Abubakara qarşı kobud oynamışdı. Referinin qərarından sonra topa yaxınlaşan Cenk dəqiq zərbə ilə komandasını hesabda önə keçirdi. Lakin İstanbul təmsilçisinin sevinci cəmi 7 dəqiqə çəkdi. Bu dəfə Volkov səhnəyə çıxdı.

Forvard Ersinin səhvindən sonra topu ələ keçirərək hesabı bərabərləşdirdi. Son 20 dəqiqədə Murad Musayev daha çox gənclərə və ehtiyat oyunçulara şans verdi. Buna baxmayaraq, “Sabah” yaxşı oyun sərgiləməyə davam etdi. Lakin hər iki komandanın cəhdlərinə baxmayaraq, başqa qol vurulmadı – 3:3. Türkiyənin Hatay bölgəsində zəlzədən əziyyət çəkənlərə yardım məqsədi ilə keçirilən görüşdə dostluq, qardaşlıq qalib gəldi.

İLKİN SULTANLI