Basketbol üzrə Avroliqada mübarizəyə hazırlaşan klublar heyətlə bağlı müəyyən dəyişikliklər edir.

“Football-plus.az” xəbər verir ki, məsələn, İspaniya yığmasının forvardı Xuanço Ernanqomes “Panatinaikos”la müqaviləni razılaşdırıb. 27 yaşlı ispaniyalı Yunanıstan klubu ilə dəyəri 4,5 milyon avro olan ikiillik müqavilə bağlayacaq. Xuanço son 7 mövsümdə MBA-da oynayıb. O, ötən mövsüm “Toronto”da keçirdiyi 42 oyunda orta hesabla 2,9 xal toplayıb və 2,9 ribaund edib.

“Barselona” da rəsmi saytında hücumameyilli müdafiəçi Kori Higginsin gedişini elan edib. Kataloniya klubu 2019-cu ildən formasını geyən 34 yaşlı amerikalı ilə müqaviləni pozub. Ona qədər isə Higgins 4 il Rusiyanın ÇSKA klubunda oynayıb. Kori İspaniya çempionatının son mövsümündə keçirdiyi 16 oyunda orta hesabla 9,7 xal, 2,2 ribaund və 1,5 ötürmə göstəricisi ilə yadda qalıb.

Bu arada “Milan” da rəsmi saytında Nikola Mirotiçin keçidini elan edib. 32 yaşlı monteneqrolu forvard İtaliya klubu ilə 2026-cı ilə qədər müqavilə bağlayıb. “Barselona” iyulun 21-də müəyyən kompensasiya qarşılığında adı çəkilən basketbolçu ilə müqaviləni vaxtından əvvəl pozmuşdu. Halbuki onun klubla hələ ikiillik müqaviləsi var idi. Mirotiç 2022/23 mövsümündə İspaniya çempionatında keçirdiyi 24 oyunda orta hesabla 13,5 xal toplayıb, 4,6 ribaund edib və 1,3 ötürmə verib.