Basketbol üzrə Avroliqanın son mövsümündən kənarlaşdırılan Rusiya klublarından “Zenit”in baş məşqçisi Xavyer Paskual növbəti mövsüm “Fənərbaxça”nı çalışdıra bilər.

Türkiyə klubu ispaniyalı mütəxəssisə ciddi maraq göstərir. Türkiyəli həmkarlarımızın yazdığına görə, klub rəhbərliyi artıq ispan mütəxəssisin maraqlarını qoruyan böyük qardaşı ilə görüşüb, tərəflər danışıqların ilk mərhələsindən razı qalıb. Paskualın “Zenit”lə müqaviləsinin müddəti 2024-ün yayına qədərdi.
Bu arada “Milan”ın mərkəz oyunçusu Kayl Hayns Avroliqanın 2021/22 mövsümünün ən yaxşı müdafiəçisi sayılıb.

Səsvermədə Edi Tavareş (Real) 2-ci, Nik Kalates (Barselona) 3-cü olub. 35 yaşlı amerikalı Avroliqanın cari mövsümündə orta hesabla 8 xal toplayıb, 5,3 ribaund edib və 1,8 məhsuldar ötürmə verib. O, “Milan”a keçənə qədər 7 mövsüm ÇSKA-nın formasını geyib, Rusiya klubu ilə iki dəfə - 2016-cı və 2019-cu illərdə Avroliqanın qalibi olub.