Basketbol üzrə Avroliqanın iştirakçıları yeni mövsüm ərəfəsində heyətlə bağlı dəyişikliklər həyata keçirir.

"Football-plus.az" xəbər verir ki, “Srvena Zvezda”nın oyun qurucusu Fakundo Kampatso “Real”a dönüb. Madrid klubu onunla 4 illik müqavilə bağladığını elan edib. 32 yaşlı argentinalı ötən ilin dekabrından “Srvena Zvezda”nın formasını geyirdi. Kampatso əvvəllər – 2014-20-ci illər aralığında da “Real”da çıxış edib, Madrid klubu ilə iki dəfə (2015, 2018) Avroliqanı qazanıb.

Bu arada “Barselona” da rəsmi saytı vasitəsi ilə forvard Nikola Mirotiçin klubdan ayrıldığını açıqlayıb. Tərəflər kompensasiya müqabilində müqavilənin vaxtından əvvəl pozulmasını razılaşdırıblar. Bununla da Mirotiç azad agentə çevrilib. Bir neçə gün əvvəl Kataloniya klubunun 32 yaşlı monteneqroludan maaşının iki dəfə azaldılmasına razılıq verməsi, onun isə bu təklifdən imtina etməsi haqda xəbər yayılmışdı. Nikolanın “Barsa” ilə hələ ikiillik müqaviləsi (mövsümə 11 milyon avro maaşla) qalırdı. Mirotiç İspaniya çempionatının 2022/23 mövsümündə 24 oyuna çıxıb, hər oyunda orta hesabla 13,5 xal toplayıb, 4,7 ribaund edib və 1,3 məhsuldar ötürmə verib.

Forvard Tornike Şengeliya isə “Virtus”dan “Panatinaikos”a keçib. İtaliya klubu 31 yaşlı gürcünü bazara çıxarmamışdı, ancaq onun gedişi “Virtus”a 3 milyon avro qazandıra bilər. Şengeliya Avroliqanın ötən mövsümündə hər oyunda orta hesabla 9,4 xal, 3,1 ribaund və 3,1 ötürmə ilə yadda qalıb.