“Bruklin”in forvardı Kevin Dürant komandasının srağagün “Vaşinqton”a qalib gəldiyi oyunda 39 xal topladı.

34 yaşlı amerikalı ulduz 30 və daha artıq xal topladığı oyunların sayını 351-ə çatdırmaqla bu göstəricidə Cerri Uesti (350) arxada qoydu və MBA tarixində 8-ci yerə yüksəldi. Bu sıralamanın lideri 562 oyunla Maykl Cordandı. Fəaliyyətdə olan oyunçular arasında isə Dürantı yalnız Lebron Ceyms qabaqlayır. Lebronun 30 və daha artıq xal topladığı oyunların sayı 514-ə bərabərdi.

Bu arada MBA oktyabr və noyabr üçün ən yaxşı basketbolçuların adını açıqlayıb. Qərb konfransında mövsümün ilk iki ayının ən yaxşısı “Finiks”in müdafiəçisi Devin Bukerdi. “Günəşlər” bu müddətdə 14 qələbə qazanıb, 6 oyunda məğlub olub. 26 yaşlı müdafiəçi hər oyunda orta hesabla 29 xal toplayıb, 5,3 ribaund edib və 5,8 məhsuldar ötürmə verib. Şərq konfransında isə “Boston”un forvardı Ceyson Teytum ən yaxşı sayılıb. O, “Seltiks”in heyətində keçirdiyi 21 oyunda orta hesabla 31,6 xal yığıb, 7,8 ribaund və 4,5 ötürmə ilə yadda qalıb. Komanda ümumilikdə 22 oyuna çıxıb, 18 qələbə qazanıb, 4 oyunda uduzub.