Xəyal Zeynalov: “Viktoriya” ilə oyundakı kobud səhvi heç bir baş məşqçi bağışlamazdı”
Keçən cümə axşamı Avroliqanın qrupunda növbəti matçına çıxan "Qarabağ" "Nant"a uduzmaqla mübarizəni məhz bu turnirdə davam etdirmək şansını çətinə saldı.
Rəqib ilk qolu Şahruddin Məhəmmədəliyevin kobud səhvindən sonra vurdu. "Köhlən atlar"ın qolkiperinin kobud səhvləri sırasına biri də əlavə olundu. Onun çıxışını dəyərləndirməsi üçün “Sabah” Akademiyasının qaçılar üzrə məşqçisi Xəyal Zeynalovla əlaqə saxladıq:"Şahruddin yaxşı qapıçıdı, hətta Azərbaycanın "1 nömrə”sidi. Amma hərdən nəyi necə etmək lazım olduğunu bilmir. Yəni həddən çox risk edir. Bu da iki məqamdan qaynaqlanır: ya Şahruddin özünə çox arxayındı, ya da oyunun axarını oxuya bilmir. "Qarabağ"ın qolkiperinin belə səhvləri xroniki xarakter alıb. Çempionlar Liqasının pley-offunda, səfərdə "Viktoriya" və başqa avrokubok oyunlarında hansısa səhvləriylə diqqəti çəkir. Şahruddin təkcə Azərbaycan yox, Avropa səviyyəsində qapıçıdı. Onun elə seyvləri var ki, hər qapıçı həmin qurtarışı edə bilməz. Deməyim odu ki, Şahruddin kimi qapıçı belə səhvlər etməməlidi. “Viktoriya” ilə oyundakı kobud səhvi heç bir baş məşqçi bağışlamazdı. Amma Qurban Qurbanov bunu etdi. Qapıçı kobud səhvlər edərək komandasını uğursuzluğa aparmasına rəğmən, yenə oynamaq şansı qazanırsa, bu birbaşa baş məşqçi amiliylə bağlıdı. Təbii, Qurban müəllim kimi mütəxəssisin yanaşması təqdirəlayiqdi. Hər məşqçi kobud səhvlərə yol verən futbolçuya güvənmir, onun arxasında durmur. Həqiqətən də Qurban müəllim futbolçularıyla yalnız məşqçi yox, həm də dost-qardaşdı. Amma başda Şahruddin olmaqla, zəif çıxış edən futbolçular bundan sui-istifadə etməməli və sıralanan səhvlərini aradan qaldırmalıdı. Səhvləri dərəcəsinə görə bağışlamaq olar. Lakin elə səhvlər var ki, göz yummaqla keçmək olmaz. Yenə deyirəm, bu Şahruddinin ilk səhvi deyil. Onun 20-21 yaşı da yoxdu ki, güzəşt edəsən. Düşünürəm ki, "Qarabağ"a səviyyəli qapıçı gətirilməli və güclü rəqabət olmalıdı. Quqeşaşvili, Ramazanov ilə Şahruddin arasında ciddi rəqabət olmadığını düşünürəm. Gürcü qapıçı son 11 turu nəzərə alsaq, 8 matçda qapını qoruyub, dağıstanlı isə 2 oyunda. Əslində ölkə çempionatında Ağdam təmsilçisinin qapıçı problemi yoxdu. İndi deyəcəyimlə heç bir komandanı aşağılamıram, amma premyer-liqada "Sabah"dan başqa "Qarabağ"a güclü müqavimət göstərən yoxdu. Odu ki, "köhlən atlar" gənc qolkiperlə də oyunları başa vura bilər. Azərbaycan çempionatıyla avrokubokları bir tutmamalıyıq. Komandada Şahruddini layiqincə əvəzləyəcək, hətta ona meydan oxuya biləcək "əlcək sahibi" yer almalıdı. Əks halda qapı xəttində güclü rəqabət olmayacaq. İki mövqe olduqca həssasdı: qapıçı və son müdafiəçi. Ona görə bu mövqelərdə daim bir-biriylə çarpışan, mübarizə aparan futbolçular olmalıdı. Bəlkə də "Nant"la oyun heç-heçəylə bitsəydi, bu gün Şahruddin çox qınanılmayacaqdı. Amma fakt odu ki, o, yaşına, təcrübəsinə yaraşmayan kobud səhv etdi və bundan nəticə çıxarmalıdı".
ABDULLA İSMAYILOĞLU
Digər xəbərlər
