Xəyal Zeynalov: “Bir qapıçının ümidinə qalmaq faciədi”
Çempionlar Liqasının 2-ci təsnifat mərhələsinin "Rakuv" - "Qarabağ" görüşünə (3:2) Şahruddin Məhəmmədəliyevin kobud səhvləri damğa vurdu.
Yığmamızın əsas qapıçısının bərbad çıxışı ilə bağlı Xəyal Zeynalova müraciət etdik. Təcrübəli mütəxəssisin “Football-plus.az” saytına söylədiklərinə keçid alaq:
"Rakuv" - Qarabağ" matçıyla bağlı bütün media və sosial şəbəkələr yazır. Onların etirazı da haqlıdı. Qapıçı bir dəfə səhv edib qol buraxırsa, bu böyük səhv deyil. İki dəfə oxşar səhv edirsə, xəstəlik yaranır. Üç dəfə eyni səhvi edirsə, artıq xroniki xəstəlikdi. Təbii ki, dünyanın ən güclü qapıçıları da səhvlər edir. Amma eyni səhvlərin təkrarlanması bağışlanmazdı. Əvvəl də dediyim fikrin üstündə qalıram. Şahruddin pis qapıçı deyil, amma onu çox yüksəklərə qaldırıb, əvəzedilməz etmişik. Baxın, dağıstanlı həlledici oyunlarda dəfələrlə təkrarladığı səhvləri edəndə onu asıb-kəsirik. Amma bir neçə oyunda 7-8 seyv edəndə göylərə qaldırır, "bu qapıçıdan yoxdu", "ona əvəzləyici ola bilməz", "Azərbaycanda Şahruddindəm yoxdu" kimi şüarlar səsləndiririk. Bununla da onu haqlı olaraq tənqid edən şəxslər pis vəziyyətə düşür. “Əvəzolunmaz futbolçu, məşqçi” ifadələri yanlışdı. Hər simanın əvəzləyicisi var. Mən "Qarabağ"ın daxili işinə qarışa bimərəm. Amma futbol camiəmiz haqlı olaraq Şahruddini səhvlərinə görə qınayanda, tənqid edəndə, Qurban müəllim daha inadla onu qoruyur. Başa düşürəm, Qurban müəllim sərəncamından olan büyün oyunçuları maksimum himayə edir, qayğı göstərir, onları təzyiqlərdən qoruyur. Amma artıq Şahruddini ucaltmağa son vermək lazımdı. Gözəl deyimimiz var: elin gözü tərəzidi. Bütün Azərbaycan görür ki, Şahruddin eyni səhvləri təkrarlamağı "sevir". Bu da Ağdam təmsilçisinin oyunlarına təsir edir. Odu ki, istər "Qarabağ"da, istərsə də millimizdə başqa alternativlər olmalıdı. Bir qapıçının ümidinə qalmaq faciədi. Ümid edək ki, bir də belə səhvlər görmərik. Belə qollar buraxmaqla yenilmək "Qarabağ"a yaraşmır. Təmsilçimizə növbəti oyunda uğurlar arzu edirəm".
ABDULLA SMAYILOĞLU
Digər xəbərlər
