"Rakuv"un çətin rəqib olacağı həm "Qarabağ"a, həm də bizə məlum idi. Nəzərə alaq ki, Ağdam təmsilçisi Polşa klubuyla yoxlama oyunu da keçirmişdi və az-çox onun güclü-zəif tərəflərinə bələd idi. Belə götürəndə "Qarabağ" oyuna pis başlamadı, qol imkanları da oldu, amma fürsətlərdən yararlana bilmədi. Rəqib isə ehtiyatla oynamaqla yanaşı, təmsilçimizin səhvlərindən yararlanaraq qollar vurdu. Amma bu heç də "Rakuv"un güclü və keçilməz rəqib olması demək deyil. "Köhlən atlar"ın 2 dəqiqəyə 2 qol vurması polşalıların da müdafiəsində ciddi problemlərin olmasından xəbər verir. Söz yox ki, "Qarabağ"ın müdafiəçiləri ilə qapıçı kobud səhvlər etdi. Amma onları qınamaq, asıb- kəsmək ilə heç nə düzəlməyəcək. Unutmayaq ki, səhvlər də futbolun tərkib hissəsidi. Mənim də karyeramda səhvlər olub. Əsas olan həmin səhvlərdən nəticə çıxararaq inkişaf etməkdi. İnanıram və əminəm ki, "Qarabağ" səfərdəki oyundan ciddi nəticə çıxarıb və cavab matçında "Rakuv"a üstün gələrək mərhələni adlayan tərəf olacaq".