“Trabzonspor”un Sloveniya toplanışı dünən başa çatdı.

"Football-plus.az" xəbər verir ki, qaradənizlilər toplanışı son 2 gündə keçirdikləri 2 oyunla tamamladılar. Əvvəlki 3 hazırlıq matçından 2 bərabərlik, 1 məğlubiyyətlə ayrılaraq qələbəyə həsrət qalan Nenad Byelitsanın kollektivi, nəhayət, tilsimi qıra bildi. Srağagün trabzonlular Şimali Makedoniya təmsilçisi “Rabotniçki” ilə qarşılaşdı və 4:1 hesablı inamlı qələbə qazandı. Maksi Qomesin erkən qolundan sonra Uğurcan Çakır kuryoz səhvə yol verərək avtoqol müəllifi oldu. Amma hələ fasiləyə qədər Bakasetas Türkiyə klubunu önə keçirdi. İkinci hissədə isə Ərən Elmalı ilə gənc forvard Enes Destan fərqləndi. Dünən “Trabzonspor” Sloveniya təmsilçisi “Triqlav”la qarşılaşdı. Byelitsa bu dəfə meydana fərqli “11-lik” buraxsa da, komanda yenə əla təsir bağışladı - 4:0. Umut Bozokun erkən qolu ilə önə keçən “bordo-mavililər”in heyətində fasilədən sonra yenə də Bozok, eləcə də yeni transfer Tonio Tekiç və Poyraz Yıldırım fərqləndi. Artıq vətənə qayıdan “Trabzonspor” mövsümün startına qədər olan müddətdə bazasında hazırlıq keçəcək. Komanda daha bir yoxlama oyunu keçirməyi planlaşdırır. İyulun 30-da Trabzona Yunanıstanın son çempionu AEK səfər edəcək.

Yeri gəlmişkən, rəhbərlik diz bağları qopan Mislav Orşiçlə bağlı yekun qərarını verib. Ötən sayımızda bu yay böyük ümidlərlə 2,4 milyon avroya transfer edilən xorvatiyalı vingerin məşqdə ciddi zədə aldığını və 8-9 aylığa sıradan çıxdığını xəbər vermişdik. Rəhbərliyin qərarı ilə mövsümlük iştirak ərizəsində bir əcnəbi oyunçuya yer açmaq üçün Orşiçin müqaviləsi dondurulacaq! Ümumiyyətlə, müqaviənin dondurulması Türkiyədə tez-tez istifadə olunan praktikadı. Belə anlaşma, adətən, uzun müddətə sıradan çıxan oyunçularla əldə olunur. Məhz elə “Trabzonspor”da son dönəmlərdə diz bağları qoparaq uzun müddətə sıradan çıxan oyunçuların sayı kifayət qədərdi. Özü də onların hamısı bu ağır zədədən sonra klubu tərk etmək məcburiyyətində qalıb. Məsələn, 2020-nin yayında yeni transfer edilən Andres Trondsen də eyni kabusu yaşamışdı. 1 ili boşa verən, sonrakı mövsümdə isə ümidləri doğrultmayan norveçli oyunçu ilə 2022-nin yayında yollar ayrılmışdı. Jervinyonun başına gələnlər də unudulmayıb. 2021-in yayında böyük ümidlərlə transfer edilən ulduz futbolçunun həmin ilin oktyabrında diz bağları qopmış və qış fasiləsində onunla yollar ayrılmışdı. 2021-nin dekabrında eyni zədə üzündən Edqar Lenin “Trabzonspor” macərası başa çatmışdı. 2022-nin sentyabrında isə Dorukhan Toközün diz bağları qopmuş və o, 2 dəfə əməliyyat olunaraq 9 aylığa sıradan çıxmışdı. Zədəli olduğu müddətdə kökəlməsi və məşqlərdə istənilən performansı sərgiləməməsi üzündən Byelitsaya lazım olmayan Dorukhan bu yay “Adana Dəmirspor”a transfer olunub.