Dünən Türkiyə çempionatının 24-cü turunda ''Trabzonspor'' doğma fanatları önündə ''Ümraniyəspor''la qarşılaşdı.

"Football-plus.az" xəbər verir ki, Trabzon təmsilçisi aşkar favorit sayılırdı. Son çempion statusunda olan Abdulla Avcının komandası həm də çempionat çərçivəsində evdə 2 ilə yaxın idi, heç kimə uduzmurdu. Son məğlubiyyət 2021-in martın 8-də ''Alanyaspor''la oyunda (1:3) qeydə alınmışdı. Həmin vaxtdan bu yana qaradənizlilər evdə 36 superliqa matçından 24 qələbə, 12 bərabərliklə ayrılmışdılar. Amma 726 günlük bu möhtəşəm seriya aşkar autsayder və debütantla qarşılaşmada başa çatdı! ''Ümraniyəspor'' tura sonuncu pillədə daxil olmuşdu. Amma tarixində ilk dəfə elitada oynayan bu kollektiv Trabzondan 2:1 hesablı tarixi qələbə ilə dönməyi bacardı! Xalını 18-ə yüksəltməsinə baxmayaraq ''Ümraniyəspor'' yenə də sonuncu pillədədi.

''Trabzonspor'' isə 38 xalla 5-ci pillədədi. Maraq üçün bildirək ki, komanda ötən mövsüm 23 oyundan sonra indikindən 16 xal artıq – 54 xal toplamışdı.