Yunis Hüseynov "Qarabağ"ın bu komandadan 6 xal alacağına inanır - AÇIQLAMA
Ölkəmizi Avroliqanın qrup mərhələsində təmsil edəcək "Qarabağ"ın dünən rəqiblərinin adına aydınlıq gəldi.
İstanbulda baş tutan püşkatma mərasimində "Olimpiakos", "Nant" və "Frayburq" Ağdam təmsilçisinə rəqib olub.
"Football-plus.az" saytı olaraq təcrübəli mütəxəssis Yunis Hüseynovdan "Qarabağ"ın şanslarını və qrupdakı rəqiblərini dərləndirməsini istədik:
"Avroliqanın qrupunda bütün komandalar güclüdü. "Qarabağ"ın qrupunda yer alan komandalar da ciddi və iddialıdı. Almaniya bundesliqası dünyanın ən güclü çempionatlarındadı və top-liqadı. Ona görə ən güclü rəqibimiz məhz "Frayburq"du. Elə adı çəkilən komandanın baş məşqçisi də "Qarabağ"la oynamaq istədiyini bildirmişdi. Fransa liqası güclü olsa da, "Nant" uğurlu start götürməyib. 3 turdan sonra komanda cəmi 2 xal qazanıb. Düşünürəm ki, "Nant"la bacaracağıq. "Olimpiakos"la daha rahat oynayacağımıza və onlardan 6 xal qoparacağımıza inanıram. Nəzərə alaq ki, "Neftçi" artıq bir dəfə Yunanıstan təmsilçisiylə qarşılaşıb. "Ağ-qaralar" heç də zəif təsir bağışlamamışdı, hətta mərhələni keçə də bilərdi. Sadəcə, bəxtimiz gətirməmişdi. "Qarabağ" artıq Avropa səviyyəli komandadı. Ona görə də "Olimpiakos"u üstələyəcəyini düşünürəm. Qurban Qurbanova və komandasına inanaq və dəstək olaq. Qalan məsələləri özləri meydanda həll edəcək. İnanıram ki, "köhlən atlar" qrupdan çıxacaq".
Təcrübəli mütəxəssis son günlər Şahruddin Məhəmmədəliyevin tənqid olunmasına da münasibət bildirdi:
"Adətən hücumçular səhv edəndə o qədər də tənqid olunmurlar. Çünki onların arxasında vingerlər, yarımmüdafiəçilər, müdafiəçilər, qapıçı dayanır. Yarımmüdafiəçilər qınanmır, çünki arxalarında müdafiəçilər, qapıçı yer alır. Müdafiçilər də kobud səhv edəndə nə qədər qınansa da, unudulur. Amma qolkiperin arxasında qapı torundan başqa heç nə yoxdu. Ona görə də "əlcək sahibi" səhv edəndə daha çox gözə çarpır və dildən düşmür. Şahruddin yaxşı qapıçıdı. Onun bacarığını yüksək qiymətləndirirəm. Ən üstün və zəif cəhəti həddən artıq istəkli olmasıdı. Çempionlar Liqasının pley-off matçına çıxan istənilən futbolçu həyəcanlı olmaqla yanaşı, çox istəkli olur. "Qarabağ"ın futbolçuları da qrupa düşmək üçün istəkliydilər, Şahruddin hamıdan çox istəkliydi. Onun səhvə çox istəkli olmasından dolayı yol verdiyini düşünürəm. Mən də bu gün "köhlən atlar"ın qolkiperini tənqid edirəm, gərək o topa çıxmayaydı. Amma bu artıq oldu, arxada qaldı. Nə keçmişə qayıda, nə də nəticəni dəyişə bilərik. Ona görə də qapıçının üzərinə bu qədər getmək, qınaq obyektinə çevirmək lazım deyil. Şahruddin hazırda "Qarabağ"ın və millimizin əsas qolkiperidi. Bundan sonra da durmadan qarayaxma kampaniyası davam etsə, onu itirə bilərik. Odu ki, söz-söhbətlərə son qoyub başda Şahruddin olmaqla bütün "Qarabağ" futbolçularına güvənib, dəstək olmaq və Avroliqanın qrupundan çıxmasına inanmaq lazımdı."
ABDULLA İSMAYILOĞLU
Digər xəbərlər
