“Yəqin ki, Qurban Qurbanov bizdən yaxşı bilir. Komandanın qapıçı məşqçisi də var. Mənə elə gəlir ki, Şahruddin “Qarabağ”da oynamağa layiqdi. Düzdü, səhv etdi. Amma Avropanın ən səviyyəli qapıçıları da səhv edir. Sadəcə, Azərbaycanda qapıçı olmaq çətindi. Təkbətək epizodda qol olanda da “qapıçı çıxara bilərdi” deyirlər. Bu futboldu, Şahruddin də robot deyil, səhv edə bilər. Bu, onun ikinci oxşar səhvidi. Yəqin xatırlayırsız, biri də ötən il olmuşdu. Oyun ərzində bir neçə seyv etsən də, bir səhv buraxanda düşürlər üstünə. Futbol belədi. Bütün bunlarla yanaşı, fikrimcə, Şahruddin “Qarabağ”da “1 nömrə” olmağa layiqdi”.

“Hər bir qapıçı üçün elə anlar çox çətin olur. Komanda hesabda öndə idi, üstün oyun sərgiləyirdi, təzyiq altında qalmamışdı. İlk qola kimi “Qarabağ” sərbəst oynayırdı. Yəni bu gedişlə oyunu tamamlamaq olardı. Amma düzgün danışmaq lazımdı, səhvinə görə Şahruddinin üstünə düşmək, baltalamaq da yaxşı deyil. Onu da demək lazımdı ki, ora kimi çıxmaq olmaz. Ümumiyyətlə, qapıçı sistemində belə bir şüar var. Bütün qapıçılara deyilir ki, hava ilə gələn toplara o vaxt çıxa bilərsən ki, top qapı xəttinə yaxın olsun. Top uzaqda, penalti nöqtəsinə, cərimə meydançasının xəttinə yaxın yerlərdə olsa, qapıçının ora çıxışı sıfır faizə bərabər olmalıdı. Çünki orda səhv olsa, qayıdıb qapıya çata bilmirsən. Sən qapını tərk edirsən, səndən başqa da heç kim əllə oynaya bilmir. Amma qapıçı cərimə meydançasının xəttinə yaxın yerə kimi çıxıbsa, mütləq topu uzaqlaşdırmalıdı. Səhv etmək haqqı yoxdu. Şahruddin də bu epizodda topa çıxdı, hətta çatdı da. Lakin problem odu ki, orda topu tutmaq və ya uzaqlaşdırmaqla bağlı dəqiq qərar verə bilmədi. Ona görə də, ümumiyyətlə, ora çıxmaq düzgün deyil. Əminəm ki, komandanın məşqçiləri də bunu qapıçılara deyir. Lakin Şahruddin risk etdi və elə alındı. Belə epizodda artıq qapıçının savadı, texnikası rol oynamalıydı ki, mənim orda nə işim var? Bütün bunlara baxmayaraq, Şahruddin əvvəlki oyunların çoxunda komandanı real qollardan da xilas edib. Futbol aləmində belə bir şey var ki, bir səhv qapıçılar üçün qlobal problemə çevrilir. Amma yüz yaxşı qurtarış o dərəcədə sevgi qazandırmır. Xırda bir səhvdən qol buraxılsa, bu hər kəsin yaddaşında qalır. Biz həmişə yetişdirdiyimiz uşaqlara deyirik ki, oyun ərzində 20 top çıxarsan, 1 səhv etsən, hər şey məhv olur. Bu futbolun yazılmamış qanunudu. Bunu dəyişə bilmərik. Bütün bunlara baxmayaraq, Məhəmmədəliyev yenə də “Qarabağ”ın bir nömrəli qapıçısı olmağa layiqdi. Çox inamlı, çevik, əzmkar və istəki futbolçudu”.