Avstriya toplanışınında keçirdiyi 3-cü oyunda Çexiya təmsilçisi ''Siqma''nı Yunus Akgün və Bafetimbi Qomisin qolları ilə 2:0 hesabıyla məğlub edən ''Qalatasaray''la bağlı yeni transfer xəbərləri var.

2019-un yanvarından bəri ''Qalatasaray''a məxsus olan, bu illər ərzində enişli-yoxuşlu qrafik cızan, ''Brügge'' və ''Vest Bromviç''ə icarəyə verilən, ötən mövsüm 22 oyuna cəmi 4 qol vuran Mbaye Dianye komandadan ayrılıb. 30 yaşlı seneqallı forvard ''Fatih Karagümrük''lə danışıqlar aparmaq üçün Avstriya toplanışını tərk edərək İstanbula gəlib. Ötən mövsüm ümidləri doğrultmayan rumıniyalı Olimpiu Morutsanın isə ''Sivasspor''a birilliyə icarəyə veriləcəyi gözlənilir.

Yeni transferlərə gəlincə, Türkiyə mətbuatının yazdığına inansaq, ''Cim-Bom'' ''Lion''un sağ cinah müdafiəçisi Leo Dyubua və son mövsümü ''Hoffenhaym''da keçirən, hazırda isə azad agent statusuna malik Avstriya yığmasının mərkəz yarımmüdafiəçisi Florian Qrillitş ilə anlaşma əldə edib. Fransa yığmasının şərəfini 13 oyunda qoruyan Dyubuanın ''sarı-qırmızılar''a 2,5 milyon avroya başa gələcəyi gözlənilir.

Fanatları həyəcanlandıran əsas xəbərlər isə Haris Seferoviçlə bağlıdı. Türkiyə mətbuatının iddiasına görə təcrübəli forvard ilə uzun müddətdi aparılan danışıqlar öz bəhrəsini verib. Həm futbolçunun özü, həm də onun uzun illərdi şərəfini qoruduğu ''Benfika'' ilə anlaşma əldə olunub. Amma 30 yaşlı forvard son dönəmlərdə tez-tez zədələnir. Təsadüfi deyil ki, ötən mövsüm o, cəmi 15 rəsmi oyuna çıxaraq 5 qol vura bilib. ''Qalatasaray'' onun durumunu dəqiqləşdirmək üçün dünən baş həkimi Yenər İncəni Portuqaliyaya göndərib. Tibbi müayinə zamanı problem çıxmayacağı təqdirdə ''Qalatasaray'' Seferoviçi birilliyə icarəyə götürəcək. İki klub arasında maraqlı detalları olan müqavilə imzalanıb. ''Qalatasaray'' ''Benfika''ya icarə haqqı ödəməyəcək. Amma futbolçu mövsüm ərzində 15 rəsmi oyuna çıxacağı halda məcburi transfer maddəsi qüvvəyə minəcək və ''Aslan'' gələn yay 3,5 milyon avro ödəməli olacaq. Seferoviçin illik maaşı 2 milyon avroya bərabər olacaq.

Qeyd edək ki, 186 sm boya malik bosniyaəsilli isveçrəli forvard daha öncə ''Qrasshoppers'', ''Fiorentina'', ''Ksamaks'', ''Novara'', ''Real Sosyedad'' və Frankfurt ''Ayntraxt''ının şərəfini qoruyub. 2017-dən bəri ''Benfika''da olan və bir dəfə çempionluq sevinci yaşayan Seferoviç lissabonluların heyətində 187 rəsmi oyunda 74 qol, 24 məhsuldar ötürməlik performans sərgiləyib. 2013-dən bəri şərəfini qoruduğu İsveçrə yığmasında isə 86 oyuna 25 qol vurub. Əbdülkərim Bardakçı, Kazımcan Karataş və Serxio Oliveyradan sonra ''Qalatasaray''ın bu yay 4-cü transferi olan Seferoviçin bu gün xüsusi təyyarə ilə İstanbula gələcəyi gözlənilir.

ƏLİ