Karlos Alkaras “Uimbldon” turnirində ilk qələbəsini ot örtüklərin kralı Novak Cokoviç üzərində qazandı.

"Football-plus.az" xəbər verir ki, əlbəttə, 20 yaşlı ispaniyalı finaldakı oyunu və psixoloji dözümü ilə - özü də öyrəşmədiyi örtükdə! - ən xoş sözlərə layiqdi. Və heç şübhəsiz, gələcəkdə dahilər sırasına düşməklə bağlı ortaya ciddi bir iddia qoydu. Ancaq Alkaras bundan artığını qazanmağa nə dərəcədə qadirdi? Onu elə indidən cəsarətlə yeni Novak Cokoviç və ya Rafael Nadal adlandırmaq olarmı? Əvvəlki nəsillərin dahi tennisçilərinin rekordlarını yeniləmək şansı necədi?

Mental hazırlıq
Cokoviçin döyüşçü xarakteri haqda artıq çox danışılıb. Novak “Böyük dəbilqə” finallarında həmişə inadla çalışıb, iş 5-ci partiyaya qədər uzanananda da, demək olar ki, uduzmayıb. Builki “Uimbldon” turnirinə qədər yeganə istisna 2012-ci ildə keçirilən “Us Open”in finalında britaniyalı Endi Marreydən aldığı məğlubiyyət idi. Amma serb 5 partiya davam edən görüşlərdə həm Nadal, həm isveçrəli Rocer Federer, həm də daha gənc nəslin təmsilçiləri – avstriyalı Dominik Tim və yunan Stefanos Sisipas ilə hesablaşıb. Alkarası məğlub etmək mümkün olmadı – ispaniyalı göstərdi ki, mental baxımdan hədsiz yüksək gərginliyin öhdəsindən gəlməyə, təcrübəli rəqiblə bərabər səviyyədə oynamağa, hətta onu məğlub etməyə qadirdi. Bəli, Cokoviç “Böyük dəbilqə”nin finalında hətta rusiyalı Daniil Medvedevə də uduzub. Ancaq həmin vaxt – 2021-ci ildə keçirilən ABŞ Açıq Çempionatında psixoloji gərginlik vardı – bir təqvim ilində “Böyük dəbilqə” turnirlərinin dördündə də qalib gəlmək perspektivi onu “yandırdı”. Bu dəfə isə Cokoviç həqiqətən səviyyəli oyun göstərdi. Onu məğlub etmək istəyən ortaya maksimum güc qoymalıydı. Və Alkaras bunu bacardı, baxmayaraq ki, bu yaya qədər ot örtüklü turnirlərdə ciddi heç nə qazanmamışdı. Maraqlıdı ki, elə son “Uimbldon”un gedişində, hələ finala xeyli qalmış çoxları ispaniyalını Cokoviçlə müqayisə etməyə başlamışdı. Əlbəttə, texnikada və bəzi başqa aspektlərdə olan fərq adi mütəxəssislərin də gözünə görünür. Bununla belə, xeyli oxşarlıq da var. Məsələn, italiyalı Matteo Berrettini qeyri-adi dərəcədə iti reaksiyanı və müdafiədə möhtəşəm oyunu qeyd edir: “Karlos refleksləri və reaksiyası ilə mənə bir qədər Novakı xatırladır. Mən topu oyuna daxil edərkən bunu hiss etdim”. Karlosa yarımfinalda uduzan Medvedev isə belə dedi: “Mən Alkarası “böyük üçlük” (Cokoviç, Federer, Nadal – red.) ilə müqayisə edərdim. O, həmin “üçlüy”ə oxşayır”.

Gələcəyi sağlıq durumundan asılıdı
Bütün bunlar azmış kimi, hətta Novak da finaldan əvvəl Alkarası özü ilə müqayisə etdi: “Düşünmürəm ki, çoxları onun ot üzərində belə uğurlu olacağını gözləyirdi. Çünki onun oyunu hər şeydən əvvəl qrunt və ləng hard örtüyünə uyğun gəlir. Ancaq Karlos parlaq şəkildə uyğunlaşdı. Bütün karyeram boyunca ən güclü tərəflərimdən biri bu olub ki, qarşıya qoyulan vəzifələrdən asılı olaraq, daim inkişaf edə, uyğunlaşa və oyunuma düzəliş edə bilmişəm. Karlos isə bunu karyerasının lap əvvəlində bacarır”.

Həqiqətən də, Alkaras uyğunlaşmağı bacardığını sübut etdi. O, “Rolan Qarros”un yarımfinalında Cokoviçə uduzdu, daha doğrusu, təcrübəli rəqibin təklif etdiyi fiziki cəhətdən ağır oyun üslubuna dözmədi. Ancaq “Uimbldon”un finalında nəinki özü çox hərəkət etdi, həm də Cokoviçi hədsiz çox qaçmağa məcbur etməklə yordu. İspaniyalı səhvləri üzərində ağılla çalışmışdı. Və indi yeni çağırışlara hazırdı. 20 yaşında artıq iki “Böyük dəbilqə” titulu var (birincini ötənilki “US Open”də - Cokoviçin yoxluğunda qazanıb). Bu ruhda davam etsə, 30 yaşına qədər onlarla titul qazana bilər. İndi o, gənc nəslin aşkar lideridi. Baxmayaraq ki, danimarkalı Holger Rune və italiyalı Yannik Sinner də var. Artıq hər şey Karlosun özündən asılıdı. İspaniyalı ideal formada olanda elə indi “böyük üçlük” səviyyəsində oynamağa qadirdi. Digər tərəfdən, onun tennis üslubu o qədər güc tələb edir ki, daimi zədələrdə gözlənilməz heç nə yoxdu. Bu üzdən Alkarasın dahiliyə gedən yolda əsas rəqibi Cokoviç və ya bir başqası yox, özünün sağlıq durumu olacaq. Karlos məşq və oyun intensivliyini aşağı salmadan ciddi zədələrdən qaça bilərsə, onda biz indi həqiqətən tennis əfsanəsinin ilk addımlarını izləyirik.

Cokoviçin fikri
Son bir ildə hamı danışır ki, Karlos oyununun müxtəlif elementlərini Rocerdən, Rafadan və məndən götürüb. Razılaşıram. Faktiki üçümüzdən də yaxşı hər şeyi götürüb. 20 yaşında psixoloji cəhətdən dözümlü və yetkin oyunçudu. Düzünə qalsa, indiyə qədər onun kimi tennisçiyə qarşı oynamamışdım. Rocerlə Rafanın özünəməxsus güclü və zəif tərəfləri var, Karlos isə mükəmməl oyunçudu. Möhtəşəm uyğunlaşma bacarığı tennis uzunömürlülüyünün və bütün örtüklərdə uğurlu karyeranın açarıdı.

Yeri gəlmişkən...
Cokoviç final görüşünün gedişində raketkanı tora vurub qırdığına görə 8 min dollar cərimələnib. Ümumingiltərə tennis klubu təsdiq edib ki, 36 yaşlı idmançı məhz “raketka ilə sərt davranış” üzündən cəriməyə məruz qalıb. O da maraqlıdı ki, Cokoviç qırıq raketkanı oyundan sonra tribunadakı azarkeşə bağışlayıb.