“Cokoviçi yalnız mən dayandıra bilərəm” - Kiryosdan iddialı açıqlama
Avstraliyalı tennisçi Nik Kiryos həmkarlarımızın “qarşıdakı “Uimbldon” turnirində Novak Cokoviçi kim dayandıra bilər” sualını cavablamalı olub:
“Heç kim bunu bacara bilməz. Mən bacarmasam, onda heç kim”.
"Football-plus.az" xəbər verir ki, Kiryos serb həmkarının “Böyük dəbilqə” turnirlərindəki rekord – 23-cü qələbəsini də şərh edib:
“Ümid edirəm ki, 30-cu “Böyük dəbilqə”sini də qazanacaq. Sadəcə, möhtəşəm nəticədi. Onun necə inadla çalışdığını, hər qələbəni necə çox istədiyini bilirəm. Hətta bəzi “Böyük dəbilqə” turnirlərini buraxmalı olub, bəzi ölkələrə getmək imkanı olmayıb. Bu üzdən yenə də qələbə acı olduğunu bilirəm”.
Bu arada ispaniyalı tennisçi Karlos Alkaras da dünyanın 1 nömrəli raketkası Cokoviçi iyulun 3-16-sı aralığında keçiriləcək “Uimbldon”da kimin məğlub edə biləcəyi ilə bağlı fikirlərini bölüşüb:
“Federer kimi Cokoviç də ot kortlarda nə vaxtsa gördüyümüz ən dahi oyunçulardan biridi. Odu ki, onu məğlub etmək çətin olacaq. Nik Kiryos artıq “Uimbldon”un finalında oynayıb, o da ot üzərində çox yaxşıdı. Cokoviçi məğlub etməyə qadir olmadığımı demirəm, ancaq düşünürəm ki, başqa örtüklərlə müqayisədə ot üzərində belə şansım azdı. Mənə elə gəlir ki, istənilən başqa tennisçi ilə müqayisədə Kiryosun Cokoviçi məğlub etmək şansı daha yüksəkdi”.
Xatırladaq ki, Cokoviç bir neçə gün əvvəl finalda Kasper Ruudu məğlub etməklə “Rolan Qarros”un qalibi olub. 36 yaşlı serb ulduz “Böyük dəbilqə” turnirlərində 23, ATP turnirlərində isə fərdi zaçotda 94 qələbə qazanıb.
