“Formula-1” komandalarından “Alfa Tauri” heyətdə dəyişiklik edib. Belə ki, 2023 mövsümünün sonuna qədər Nik De Vrisin əvəzinə Daniel Rikkyardo bu komandanın uğurları üçün çalışacaq.


"Football-plus.az" xəbər verir ki, məhz bu il “Formula-1”də ilk tam mövsümünü keçirən De Vrisin qovulması zəif nəticələrlə bağlıdı. 28 yaşlı niderlandlı pilot cari mövsümün ilk 10 mərhələsində bir xal da toplamayıb və sonuncu – 20-ci pillədə qərarlaşıb.

Rikkyardo 2012-13-cü illərdə artıq “Alfa Tauri”nin heyətində çıxış edib, düzdü, komanda onda “Toro Rosso” adlanırdı. 34 yaşlı avstraliyalı ötən mövsüm “Maklaren”in pilotu idi və 37 xal toplamaqla şəxsi hesabda 11-ci yeri tutdu. Rikkyardo yanvarın 21-23-də keçiriləcək Macarıstan mərhələsində köhnə-yeni komandasının heyətində debüt edəcək.

“Alfa Tauri”nin rəhbəri Frants Tost da komandanın De Vrisi Rikkyardo ilə əvəzləmək qərarını şərh edib: “Danieli yenidən komandamızda salamladığımıza görə şadıq. Onun pilot bacarıqlarına heç bir şübhəmiz yoxdu, komandadakı adamların əksəri ilə tanışdı, uyğunlaşması asan olacaq. “Alfa Tauri” Rikkyardonun təcrübəsindən faydalanacaq, axı o, karyerası boyunca 8 dəfə mərhələ qalibi olub. Biz həmçinin Nik De Vrisə dəyərli işinə görə təşəkkür etmək istəyirik. “Alfa Tauri” ona gələcəkdə hər şeyin ən yaxşısını arzulayır”.

“Formula-1” üzrə dünya çempionatının dördqat qalibi Sebastyan Fettel De Vrislə bağlı bunları deyib: “Açığını deyim ki, Nikə görə heyifsilənirəm. Hər şey belə bitdiyinə görə. Nik əla şans qazandı, bəlkə də hər şey onun gözlədiyi və ya ondan gözlənilən kimi olmadı. Niklə ilk dəfə ötən il görüşmüşəm, mənə çox yaxşı adan təsiri bağışladı. Və həm də yaxşı pilotdu. “Formula-2” çempionatında qalib gəlib, beynəlxalq seriyaların qalibi olub, ad-san qazanıb. Ümid edirəm ki, bu qərar onun özünəinamını sarsıtmayacaq”.