Almaniyanın "Audi" avtomobil şirkəti dünən 2026-cı ildə "Formula-1" üzrə dünya çempionatına gələcəyini rəsmən elan edib.

Bu xəbər Belçika “Qran-pri”sindən əvvəl keçirilən mətbuat konfransında açıqlanıb. Konfransda Beynəlxalq Avtomobil Federasiyasının prezidenti Məhəmməd bin Sulayem də iştirak edib.

"Audi"nin təkcə öz mühərrikini yaratması yox, həm də hazırda "Formula-1"də "Alfa Romeo" brendi altında çıxış edən "Sauber"in əsas sahibi olacağı gözlənilir. Almaniya təmsilçisi komandada 75 faiz pay sahibi olmalıdı.

Avtoidman dünyası ilə bağlı daha bir maraqlı xəbər var. Daniel Rikkyardo ilə “Maklaren” mövsümün sonunda yollarını ayıracaqlarıyla bağlı rəsmi açıqlama verib. Rikkyardo komandaya 2021-ci ildə qoşulsa da, iki ildi bolidə öyrəşməkdə çətinlik çəkir və komanda yoldaşı Lando Norrisə böyük fərqlə uduzur. Buna görə də “Maklaren” bir neçə həftə əvvəl yolları ayırmaq üçün proses başladıb. Danışıqlar artıq başa çatıb və tərəflər yolları ayırmağa qərar veriblər. Bu xəbəri avstraliyalı sürücü elan edib.

Xatırladaq ki, Danielin komanda ilə müqavilə müddəti ötən ilin sonunda bitəcəkdi. Lakin 33 yaşlı pilot bütün çətinliklərə baxmayaraq, komandadan ayrılmayacağını demişdi. Vəziyyət düzəlmədiyindən tərəflər ayrılmağa qərar verib. Rəsmən açıqlanmasa da, Daniel komandadan gələn ilin maaşını da alacaq. Rikkyardonu böyük ehtimalla həmvətəni Oskar Piastri əvəz edəcək. Danielin isə gələn il “Alpin” və ya “Haas” üçün yarışacağı iddia olunur.