Hazırda davam edən “Uimbldon” turnirinin əsas kəşflərindən biri də rusiyalı tennisçi Mirra Andreyevadı.

"Football-plus.az" xəbər verir ki, “Tennis World USA” onun Fransa vətəndaşı olmağı planlaşdırdığını iddia edib. Belə ki, Mirra Fransada yaşayır və məşq edir. Bu ölkənin vətəndaşlığını almaq üçün 5 il yaşamaq və dil testlərindən keçmək tələb olunur.

Xatırladaq ki, martın sonunda bir başqa rusiyalı xanım – Varvara Qraçeva da Fransa vətəndaşlığını alıb və indi beynəlxalq turnirlərdə məhz bu ölkəni təmsil edir.

16 yaşlı Andreyeva “Uimbldon” turnirinin 1/8 finalında amerikalı Medison Kisə uduzmaqla mübarizəni dayandırıb. “Tennis World USA” son iddia ilə Rusiya tennis ailəsində çaxnaşma yaradıb. Əvvəlcə onun agenti Lev Kassil xəbəri şərh etməli olub: “Mirranın Fransa vətəndaşlığını alacağı ilə bağlı bugünkü informasiya doğru deyil. O, yalnız Rusiya vətəndaşıdı və bundan sonra da ölkəsinin adından çıxış edəcək”.

Rusiya Tennis Federasiyasının prezidenti Şamil Tarpişev də bu mövzuda düşüncələrini ictimaiyyətlə bölüşüb: “Bununla bağlı qərarı Mirra yox, valideynləri verəcək. Əlbəttə, Fransada onları səhərdən axşama qədər “hazırlayırlar”. Biz, yəni federasiya bu mövzuda heç nə edə bilmərik. Bizlə bağlı məhdudiyyətlər var. Mənim hətta “Rolan Qarros”a getmək, ünsiyyət saxlamaq imkanım yoxdu”.

WTA reytinqinin 102-ci pilləsində qərarlaşan yeniyetmə istedadın anası Raisa Andreyeva da açıqlama verməli olub: “Belə şayiələrin hardan ortaya çıxdığını bilmirəm. Agentimiz artıq xəbəri təkzib edib. Mənim bu mövzuda əlavə edəcəyim nəsə yoxdu”.

Azərbaycanda geniş yayılan bir atalar məsəlində deyilir ki, od olmayan yerdən tüstü çıxmaz! Heç şübhəsiz, Mirra ilə bağlı yayılan iddia da səbəbsiz deyil. Bizə elə gəlir ki, Rusiya idmanına, tennisinə rəhbərlik edənlər təkzib çalışmalarıyla yanaşı, bir sualın üzərində də düşünməlidilər: görəsən, son illərdə onlarla rusiyalı tennisçinin vətəndaşlığını dəyişməsinin səbəbi nədi? Nədən onlar Rusiyanın idman şərəfini qorumaq istəmirlər?