Rusiyanın 6-cı qadın tennisçisi və dünya reytinqinin 41 nömrəsi Varvara Qraçeva, nəhayət, Fransa vətəndaşlığı alıb.

"Football-plus.az" xəbər verir ki, 22 yaşlı xanım bu niyyətini çoxdan açıqlamışdı və indi “Ekip”in yaydığı xəbərə görə, üçillik cəhdləri nəticə verib. Son 6 ildə Fransanın Kann şəhərində yaşayan və məşq edən Varvara qarşıdakı turnirlərdə artıq protokolda bayrağı dəyişə və Fransa yığmasına dəvət oluna bilər (yığmada Karolin Qarsiyadan sonra reytinqdə ikinci olacaq). Bəs Rusiya tennisi bu transferdən nə itirəcək və Varvara özü nə qazanacaq?
Vətəndaşlığını dəyişən idmançı yaxınlarda verdiyi müsahibədə belə demişdi:

Varvara bir müddət əvvəl iddia edirdi ki, bayrağı dəyişməklə bağlı addımlarının siyasətlə heç bir bağlılığı yoxdu. Ancaq hadisələrin indiki axarında belə hərəkətlər istər-istəməz qeyri-sağlam ajiotaj doğurur. Bir halda ki, xüsusən tennisdə kiçik yaşlarından bəri ölkə xaricində yaşayan və məşq edən, bununla belə, yarışlarda məhz Rusiyanın adından çıxış edən xeyli idmançı var. Mariya Şarapovanın karyerası belələrinə dair ən parlaq nümunədi. Bundan başqa, Qraçeva Fransa pasportu almaqla yanaşı, Rusiyanın idman vətəndaşlığını da qoruya bilərdi.

Düzdü, Varvara hazırda davam edən “Rolan Qarros”un elə 2-ci mərhələsində mübarizəni dayandırdı. Bununla belə, mövsümü ümumilikdə yaxşı keçirir və böyük ümidlər vəd edir. O, yazın əvvəlində formasının zirvəsində idi, Ostin turnirində finala qədər irəliləyə, WTA-1000 və İndian-Uells turnirlərində 1/4 finalda oynaya bilmişdi. Varvaranın Qazaxıstan yığmasını seçəndən sonra önəmli şəkildə “artıran” və indi qadın tennisində “top-3”ün həndəvərində olan Yelena Rıbakinanın taleyini təkrarlaması nəzəri cəhətdən mümkündü. Ancaq tennisdə hadisələrin axarını proqnozlaşdırmaq çətindi. Elə Qraçeva ilə bağlı tarixçə də Rıbakinanın yaşadıqlarından fərqlidi.

Moskvaətrafı Jukovski şəhərində dünyaya gələn Varvara 14 yaşında Almaniyanın Münster şəhərinə köçüb və orda bir müddət Nina Bratçikovanın rəhbərliyi altında məşq edib. 16 yaşından isə Kannda yaşayır. Orda əvvəlcə Jan-Rene Lisnarın (Daniil Medvedevin sabiq məşqçisi) əlinin altında çalışıb, indi isə digər yerli mütəxəssis Jerar Solveslə çalışır. Yeri gəlmişkən, Varvara indiyə qədər Rusiya yığmasına cəlb olunmayıb. Sadəcə, ona görə ki, ulduz həmvətənlərinin kölgəsində qalıb. 2022-dən bəri isə rusiyalı tennisçiləri məlum səbəbdən Billi Cin Kinq kubokuna buraxmırlar. Məhz bu turniri, həmçinin qarşıdakı Paris Olimpiadasını gənc ulduzun idman vətəndaşlığını dəyişməsi baxımından ciddi əsas saymaq olar.

Həqiqətə daha yaxın olan daha bir versiya isə maddi həvəsləndirmə ilə bağlıdı. Fransa Tennis Federasiyası oyunçulara real şəkildə yardım etməsi ilə tanınır. Məsələn, böyük turnirlərə “wild card” almaqda və ya tennis klublarında məşq etmək üçün ciddi endirimlər müəyyənləşdirməkdə. İdman vətəndaşlığını dəyişməyin əvəzində bütün bu məsələlərdə imtiyaz yiyəsi olmaq tam real variantdı. Bu başqa məsələ ki, hazırda çabalayan Rusiya tennisinin də Varvaraya hansısa alternativ təqdim etmək imkanı yoxdu.

Rusiya vətəndaşlığından imtina edən, fəaliyyətdə olan tennisçilər
oyunçu ölkə keçdiyi il reytinqi
Mixail Kukuşkin Qazaxıstam 2008 296
Yuliya Putintseva Qazaxıstan 2012 58
Arina Rodionova Avstraliya 2014 206
Darya Qavrilova (Sevill) Avstraliya 2015 137
Timofey Skatov Qazaxıstan 2015 147
Aleksandr Bublik Qazaxıstan 2016 51
Yelena Rıbakina Qazaxıstan 2018 4
Natela Dzalamidze Gürcüstan 2022 69*
Varvara Qraçeva Fransa 2023 41
* cütlərin reytinqi.