Londonda keçirilən “Uimbldon” turniri artıq həlledici mərhələyə qədəm qoyub.

“Football-plus.az” xəbər verir ki, srağagün və dünən turnirdə 1/4 final oyunları keçirildi. Dünyanın 1 nömrəli tennisçisi Karlos Alkaras son 30 ildə 21 yaşı tamamlanana qədər eyni ildə həm “Rolan Qarros”da, həm də “Uimbldon”da 1/4 finala çıxan 4-cü tennisçi oldu. 20 yaşlı ispaniyalı bazar ertəsi 1/8 finalda Matteo Berrettinini məğlub etdi. Alkaras builki “Rolan Qarros”da da yarımfinala qədər irəliləmiş və həmin mərhələdə Novak Cokoviçə uduzmuşdu. 21 yaşını tamamlamadan eyni ildə həm “Rolan Qarros”un, həm də “Uimbldon”un 1/4 finalına çıxan əvvəlki üç tennisçi Rocer Federer, Rafael Nadal və Novak Cokoviçdi.

Yeri gəlmişkən, Cokoviç o dərəcədə parlaq ulduzdu ki, hər dəfə onun haqda yazmaya bilmirik. 1/4 finalda Andrey Rublevi məğlub edən serb ulduz “Uimbldon”da qələbə seriyasını 33-ə çatdırdı və bu göstəricidə indi yalnız Federerlə (40) Byorn Berqdən (41) geri qalır. 36 yaşlı tennisçi həmçinin “Uimbldon”da 12-ci dəfə yarımfinala adladı. Bu göstəricidə də onu yalnız Federer (13) qabaqlayır.

Builki “Uimbldon”un kəşflərindən biri də Mirra Andreyevadı. 1/8 finalda amerikalı Medison Kisə uduzan 16 yaşlı rusiyalı mükafat fondundan ona çatacaq 207 min funtu (453 min manat – red.) necə xərcləyəcəyi haqda danışıb: “Heç bir planım yoxdu. Hələ ki bütün pullar valideynlərimə gedir, onlar nə etməli olduqlarına qərar verirlər. Pulun əsas hissəsi tennisə, biletlərə, məşqçilərə ödənişlərə, məşq üçün lazım olan şeylərə gedəcək. Bəlkə də özümə nəsə alam, ancaq hələ bilmirəm”.

Yeri gəlmişkən, Andreyeva Kislə oyundakı davranışına görə 8 min dollar cərimələnib. O, iki dəfə raketkanı yerə çırpıb, eləcə də oyundan sonra hakimin əlini sıxmayıb.

Bu arada turnirdə əlsıxma ilə bağlı maraqlı durum yaranıb. Ümumingiltərə laun-tennis və kroket klubunun baş icraçı direktoru Salli Bolton bəyan edib ki, “Uimbldon”un təşkilatçıları ukraynalı idmançıların ruslarla belarusların əlini sıxmaycağına dair azarkeşləri xəbərdar etməyəcəklər: “Biz əlsıxmanın olmayacağı barədə elan verməyəcəyik. Düşünürəm ki, bu turnirin publikası nələrin baş verməsindən xəbərdardı. Hesab edirəm ki, möhtəşəm oyunlardan sonra biz yalnız tennis haqda danışmalıyıq, qalan şeylərə köklənməməliyik”.

İş ondadı ki, iyulun 9-da keçirilən 1/8 final oyunundan sonra ukraynalı Yelina Svitolina qalib gəldiyi belaruslu Viktoriya Azarenkonun əlini sıxmaqdan imtina edib. Ardından ukraynalı beynəlxalq tennis qurumlarını Rusiya və Belarus təmsilçiləri ilə oyunlarda əlsıxmanı ləğv etməyə çağırıb. Bu ideyanı belaruslu Arina Sobolenko da dəstəkləyib. Qadınların Tennis Assosiasiyası (WTA) isə bəyan edib ki, ukraynalı idmançıların Rusiya və Belarusdan olan rəqiblərin əlini sıxmaq ənənəsindən imtina etməklə bağlı mövqeyinə hörmətlə yanaşır.

1/4 final
Kişilər
Sinner (İtaliya, 8) - Safiullin (Rusiya) 6:4, 3:6, 6:2, 6:2
Cokoviç (Serbiya, 2) - Rublev (Rusiya, 7) 4:6, 6:1, 6:4, 6:3
Medvedev (Rusiya, 3) - Yubenks (ABŞ) 6:4, 1:6, 4:6, 7:6 (7:4), 6:1
Alkaras (İspaniya, 1) - Rune (Danimarka, 6) 7:6 (7:3), 6:4, 6:4
Qadınlar
Vondrouşova (Çexiya) - Pequla (ABŞ, 4) 6:4, 2:6, 6:4
Svitolina (Ukrayna) - Sventek (Polşa, 1) 7:5, 6:7 (5:7), 6:2
Sobolenko (Belarus, 2) - Kis (ABŞ, 25) 6:2, 6:4
Jaber (Tunis, 6) - Rıbakina (Qazaxıstan, 3) 6:7 (5:7), 6:4, 6:1