Daniil Medvedevin agenti Lev Kassil 10 gün əvvəl maraqlı açıqlama ilə gündəm olub.

"Football-plus.az" xəbər verir ki, o, rusiyalı tennisçilərinin yalnız 15 faizinin “Uimbldon”da və mövsümün ot örtüklü kortlarında yarışmaq üçün Böyük Britaniya vizasını aldığını bildirib. Halbuki Böyük Britaniya laun-tennis və kroket klubu hələ martın sonlarında rusiyalı və belaruslu idmançıları neytral statusla “Uimbldon”a buraxacağını açıqlamışdı. Rusiya Tennis Federasiyasının prezidenti Şamil Tarpişev həmkarlarımızın məsələ ilə bağlı sualını belə cavablayıb: “Bütün aparıcı tennisçilərimiz “Uimbldon”da çıxış etməlidi. Medvedev, Rublev, Xaçanov – heç birinin viza problemi yaşamayacağına əminəm”.
Funksioner həmçinin adını çəkdiyi hər üç idmançının təqvim ilini reytinqin ilk “10-luğ”unda başa vuracağını əlavə edbi: “Rublev, Medvedev və Xaçanovun ilin sonunda ilk “10-luq”da olacağına əminəm. Bunun üçün hər şeyə sahibdilər. Təəssüf ki, Daniil Fransada mübarizəni erkən dayandırdı, daha çox xal qazana bilərdi. Ancaq yenə də ili birinci sırada bitirə bilər, deyəsən, onu bundan 500 xal ayırır. İstənilən halda, üç rusiyalı tennisçinin reytinqin ilk “10-luğ”unda olması tarixi hadisədi”.

Xatırladaq ki, rusiyalı idmançılar 2022-ci ildə təşkilatçıların qadağası səbəbindən “Uimbldon”da iştirak edə bilməmişdilər. Yeri gəlmişkən, turnirdə artıq ilk itki də yaşandı. Xorvatiyalı Marin Çiliç “Uimbldon”da çıxış edə bilməyəcək. Onun yerinə əsas mərhələdə alman Dominik Kepfer mübarizə aparacaq. Çiliç həm də Londondakı “Queen’s update” yarışından çəkilib. Yanvarda dizindən əməliyyat keçirən 34 yaşlı tennisçi martda məşqlərə qayıtsa da, hələlik turnirlərdə iştirak etməyə hazır deyil.