Kral öldü, yaşasın yeni kral!
Londonda keçirilən, 57 milyon 290 min dollar mükafat fonduna malik “Uimbldon” turniri srağagün başa çatdı.
"Football-plus.az" xəbər verir ki, qadınlar arasında turnirdə sürpriz finalla üzləşdik. O mənada ki, “böyük üçlük”dən, yəni Sventek, Sobolenko və Rıbakinadan heç biri həlledici oyuna vəsiqə qazana bilməmişdi. Elə şənbə günü keçirilən final oyunu da sürpriz sonluqla bitdi. Buna qədər dünya reytinqində 42-ci olan Marketa Vondrouşova dünyanın 6-cı tennisçisi Ons Jaberi məğlub etdi. Özü də cəmi 1 saat 20 dəqiqə davam edən görüşdə. Karyerasında ilk dəfə “Böyük dəbilqə”nin qalibi olan 24 yaşlı çexiyalı dünəndən artıq dünyanın 10-cu qadın tennisçisidi. Ümumiyyətlə, Marketa qadınlar arasında “Uimbldon” turnirinin qalibi olan ən aşağı reytinqli tennisçi, Açıq erada bu turniri qazanan 5-ci solaxaydı (Enn Cons, Martina Navratilova, Petra Kvitova və Anjelika Kerberdən sonra).
Ardıcıl 2-ci il “Uimbldon”un finalında uduzan (ötən il Yelena Rıbakinaya) 28 yaşlı Jaberin fikirləri:
“Danışmağa çətinlik çəkirəm, çünki çox ağırdı. Fotolarda qorxunc görünəcəm. Düşünürəm ki, bu, karyeramdakı ən acınacaqlı məğlubiyyətdi. Əvvəlcə Marketanı və komandasını təbrik etmək istəyirəm. Bilirəm ki, çoxlu zədən olub, bu üzdən sənə görə sevinirəm. Təslim olmaq fikrində deyiləm. Daha güclü şəkildə dönəcəm. Daim mənə inanan komandama da təşəkkür etmək istəyirəm. Nə vaxtsa istədiyimizə çatacağıq – sizə söz verirəm. Çətindi, ancaq bu tennisdi. Söz verirəm ki, bir gün dönəcəm və bu turniri qazanacam”.
Vondrouşova da qələbədən sonra media önünə çıxdı:
“Nə baş verdiyini bilmirəm, çox maraqlı hissdi. Ons, səni təbrik edirəm, hamımızı ruhlandırırsan. Ümid edirəm ki, nə vaxtsa qalib gələcəksən. Bütün yaşadıqlarımdan sonra bu gün burda kubokla dayanmağıma inana bilmirəm. Qayıdış həmişə çətindi. Bu səviyyəyə dönə biləcəyimə inanırdım. Kiçik bacım orda – yuxarıda ağlayır. Sabah həyat yoldaşımla evliliyimizin bir ili tamam olur, hər şey necə də gözəldi. Bu iki həftədən böyük məmnunluq duydum. Bir qədər yorucu olsa da, özümlə qürur duyuram. Qələbə ilə bağlı döymə etdirəcəyəmmi? Bilmirəm, ancaq məşqçimlə mərc etmişdik. Mənə demişdi ki, bu turniri qazansam, o da döymə etdirəcək. Odu ki, sabah bu işi görməliyik”.
Bazar günü kişilərin turnirində final oyunu keçirildi. Karlos Alkaras 4 saat 46 dəqiqə davam edən oyunda Novak Cokoviçi məğlub etdi. Əvvəlcə bu görüşlə bağlı bəzi statistik məqamları xatırladaq. Serb ulduz karyerasında ilk dəfə “Uimbldon”da ilk seti qalib kimi bitirdiyi oyunda qələbə qazana bilmədi. İndiyə qədər 77 belə oyunda sonda da qələbəni bayram etmişdi. 4 saat 46 dəqiqə davam edən final bu göstəricidə yalnız 2019-dakı finaldan geri qaldı. Onda Cokoviçlə Rocer Federer 4 saat 57 dəqiqə ərzində münasibətləri aydınlaşdırmış, serb bu dueldən qalib ayrılmışdı - 7:6, 1:6, 7:6, 4:6, 13:12. Karyerasında 2-ci dəfə “Uimbldon”un finalında uduzan (1-ci dəfə 2013-də britaniyalı Endi Marreyə), bu turniri indiyə qədər 7 dəfə qazanan 36 yaşlı Cokoviç Federerin rekordunu (Londonda 8 titul) təkrarlaya bilmədi.
Alkaras Cokoviçin “Uimbldon”un mərkəzi kortunda son 10 ildə ilk məğlubiyyətinə səbəbkar oldu. Yuxarıda da vurğuladığımız kimi, serb ulduz sonuncu dəfə Marreylə bacarmamışdı. 20 yaşlı ispan “Uimbldon”da ilk, “Böyük dəbilqə” turnirlərində isə 2-ci (ötənilki “US Open”in də qalibi olub) qələbəsini qazandı.
“Böyük dəbilqə” turnirlərinin 23 qat qalibi olan Cokoviç finaldan sonra bunları dedi:
“Hamının günü xeyirli olsun. Əlbəttə, mənim üçün xeyirli deyil. Karlosu və komandasını tərifləməkdən başlamaq istəyirəm. Qələbəni haqq etdin. Düşünürdüm ki, qrunt və ya hard örtükdə sənlə problem yaşayacam, ancaq ot üzərində yox. Hər şey dəyişdi. Ot örtüyə yaxşı uyğunlaşdın. Emosiyalar sakitləşəndən sonra özümdən razı qalacam. Son illərdə burda çoxlu çətin oyunda qələbə qazanmışam. Məsələn, 2019-da Federer üzərində. Sabah səhər yəqin bu nəticə ilə qürur duyacam. Hələ ki qələbəyə çox yaxın olduğum oyunda məğlubiyyəti qəbul etmək mənim üçün çətindi. Bu gün güclü rəqibə uduzdum, onu təbrik etmək və irəli baxmaq lazımdı. Oğlumun hələ də burda olduğunu, gülümsədiyini görmək xoşdu (bu məqamda göz yaşını saxlaya bilmədi – red.). Sizi sevirəm, dəstəyinizə görə sağ olun”.
Alkaras da qələbə çıxışı etdi:
“Bu, arzularımın yerinə yetməsidi. Əlbəttə, qələbə əladı, ancaq məğlub olsaydın da, özümlə qürur duyacaqdım. Bu gözəl turnirin tarixini yazmaq, finalda idmanın əfsanəsi ilə qarşılaşmaq mənim üçün qeyri-adi hadisədi. Özüm, komandam və görülən işlə qürur duyuram. Novakı təbrik etməliyəm. Mən sənə baxa-baxa tennis oynamağa başlamışam. Mən dünyaya gələndə sən artıq turnirləri qazanırdın. Ot örtüyə dərhal vuruldum. Qısa müddətdə bu səviyyədə oynaya biləcəyimi gözləmirdim. Ot üzərində yalnız dörd turnir keçirmişəm”.
final
Kişilər, fərdi
Alkaras (İspaniya, 1) - Cokoviç (Serbiya, 2) 1:6, 7:6 (8:6), 6:1, 3:6, 6:4
Qadınlar, fərdi
Vondrouşova (Çexiya) - Jaber (Tunis, 6) 6:4, 6:4
Kişilər, cütlər
Kolhof/Skupski (Niderland/B.Britaniya, 1) – Qranolyers/Sebalyos (İspaniya/Argentina, 15) 6:4, 6:4
Qadınlar, cütlər
Suvey/Strıtsova (Tayvan/Çexiya) – Hanter/Mertens (Avstraliya/Belçika, 3) 7:5, 6:4
Qarışıq
Kiçenok/Paviç (Ukrayna/Xorvatiya, 7) – İfan/Vligen (Çin/Belçika) 6:4, 6:7 (9:11), 6:3
Digər xəbərlər
