Məlum olduğu kimi, “Real” bugünlərdə heyətini “Fənərbaxça”nın və Türkiyə futbolunun gənc ulduzu Arda Gülər ilə gücləndirdi.

"Football-plus.az" xəbər verir ki, “kral klubu” 18 yaşlı yarımmüdafiəçiyə görə İstanbul nəhənginə 20 milyon avro ödəyəcək. Müqavilədə 10 milyon avroluq bonus da nəzərdə tutulub. Dünən “Real”da tətil başa çatdı və futbolçular Valdebebasda yerləşən bazada toplaşdılar. Onlar adəti üzrə “Sanitas La Moralexa” Universitetinin xəstəxanasında tibbi müayinədən keçdilər və daha sonra baş məşqçi Karlo Ançelottinin rəhbərliyi altında trenajor zalında yüngül məşq etdilər. Əslində ötən ay öz yığmalarının heyətində yer alan futbolçulara birhəftəlik əlavə tətil verilib. Onlar düşərgəyə iyulun 17-də qoşulacaqlar. Buna baxmayaraq, Arda Gülər də bazaya gələn oyunçular arasında olub. Halbuki iyunda o, Türkiyə yığmasının heyətində hər iki matçda iştirak etmişdi və “Real”ın düşərgəsinə gec qoşulmağa haqqı çatırdı. Gənc oyunçunun 7 günlük tətildən yararlanmaq istəməməsi və erkən gəlməsi “Real” tərəfindən həm təəccüblə, həm də xoş qarşılanıb. Hərçənd dünən “Real”ın rəsmi saytında tibbi müayinədən və trenajor zalından paylaşılan şəkillərdə Arda Gülər yer almayıb. Orda Toni Kroos, Ferlan Mendi, Federiko Valverde, Lukas Vaskes, Dani Sebalyos kimi oyuçuların, eləcə də yeni transferlərdən Cud Bellingem və Braim Diasın şəkilləri paylaşılıb. Ancaq Türkiyə mətbuatında Ardanın maşında bazaya gələrkən çəkilmiş şəklinə rast gəlmək mümkündü.

Qeyd edək ki, “Real” həftəsonuna qədər yığma üzvləri olmadan məşqlərini davam etdirəcək. Ayın 19-da Madrid nəhəngi ABŞ turnesinə yollanacaq və orda “Milan” (23 iyul), “Mançester Yunayted” (27 iyul), “Barselona” (30 iyul) və “Yuventus” (2 avqust) ilə qarşılaşacaq. Ardanın da ABŞ-a yollanacaq heyətdə olacağı gözlənilir.

Bu arada Arda Gülər uğrunda mübarizədə “Real”a məğlub olan “Barselona”nın yeni idman direktoru Deku susqunluğunu pozaraq ilk dəfə bu mövzu barədə danışıb. Xatırladaq ki, portuqaliyalı futbol adamı Arda və ailəsi ilə danışıqlar aparmaq üçün İstanbula gəlmişdi. İlk günlər bu mübarizədə məhz “Barsa” favorit sayılırdı. Kataloniya nəhəngi Ardanı birinci il üçün icarə əsasında “Fənərbaxça”ya verməyə razı olduğuna görə İstanbul nəhəngi də gənc ulduzun məhz bu kluba keçməsini istəyirdi. Amma şayiələrə inansaq, “Real”ın Ardanın atasına 15 milyon avroluq komissiya haqqı ödəməsi bu məsələdə həlledici rol oynadı! Deku dünən günorta Barselonadakı restoranlardan birindən çıxarkən jurnalistlərin əhatəsinə düşdü. Təbii ki, ona ən birinci Arda Gülər barədə sual ünvanlandı. Dekunun cavabı belə oldu: “Arda Gülərin transferi nə üçün baş tutmadı? İnanın ki, heç özüm də bilmirəm. Həqiqəti söyləyirəm. Arda Gülər üçün birdən-birə nə dəyişdiyini bilmədim və anlamadım”.

Dekunun sözlərindən də belə anlamaq olar ki, türkiyəli ulduz əvvəlcə məhz “Barselona” ilə şifahi razılıq əldə edibmiş.