“Fənərbaxça”nın və Türkiyə futbolunun gənc ulduzu Arda Gülər hazırda Avropada ən çox müzakirə olunan futbolçuların başında gəlir.

“Football-plus.az” xəbər verir ki, ən son Türkiyə yığmasının heyətində Uelsə vurduğu mükəmməl qolla istedadını bir daha ortaya qoyan 18 yaşlı yarımmüdafiəçiyə “Real”, “Barselona” və “Milan” başda olmaqla Avropa futbolunun “qaymaqları” ciddi maraq göstərir. 2005-ci il təvəllüdlü solaxay futbolçu geridə qoyduğumuz mövsüm “Fənər”in heyətində 35 rəsmi oyunda 6 qol, 7 məhsuldar ötürməlik performans sərgilədi. 2022/23-də onun müqaviləsində mühüm bir maddə var idi. Belə ki, Arda bütün turnirlərdə ən azı 1500 dəqiqə meydanda olmalıydı. Bu şərt yerinə yetirilməsə, onun təzminatı cəmi 5 milyon avroya bərabər olacaqdı. Gənc istedad 1531 dəqiqə meydanda oldu. Yəni tələb olunan şərti cəmi 31 dədqiqə üstələdi. İndi onun təzminatı 17,5 milyon avrodu. Ardanı heyətində görmək istəyən kollektiv “Fənər”ə məhz bu məbləği ödəməlidi.
Çoxdan “Real”la “Barselona”nın eyni futbolçu uğrunda bu dərəcədə rəqabət aparmasının şahidi olmamışdıq. Bu oyunçunun türk olması qürurvericidi. Son bir həftədə Arda uğrunda əsl “El Klasiko” yaşanır. Əvvəlcə “Real”ın təklifinə nəzər salaq. Madrid nəhəngi danışıqlar üçün İstanbula Roberto Karlosla direktor Emilio Butragenyonu göndərib. Karlos həm də “Fənərbaxça”nın sabiq futbolçusudu və təbii ki, istanbullularla yaxşı əlaqələri var. “Real” 17,5 milyon avronun 8,75 milyon avrosunu nəğd, yerdə qalan hissəsini isə hərəsi 4,375 milyon avro olmaqla iki yerə bölərək ödəməyi təklif edib. Bundan başqa, “blankos” “Fənər”ə Ardanın sonrakı satışından 20 faiz pul təklif edib. Amma “Real”ın təklifində Gülərin daha bir mövsüm “Fənərbaxça”da icarə əsaqsında oynaması ilə bağlı şərt yoxdu. Bir çox mənbələrin yazdığına inansaq, futbolçu özü “Real” azarkeşidi və bu kluba keçməyə can atır. Amma “Barselona” sanki bu transferdə daha istəkli görünür. Prezident Xuan Laporta son 4 gündə iki dəfə Arda ilə bağlı açıqlama verərək bu transferin klubu üçün strateji baxımdan mühüm əhəmiyyət kəsb etdiyini vurğulayıb. “Barsa” danışıqlar üçün İstanbula yeni idman direktoru Dekunu göndərib. Deyilənə görə, Deku Ardanı çox bəyənir və yeni işində ən birinci məhz bu oyunçunu “Barsa”ya qazandırmağa çalışır. Kataloniya nəhənginin təklifi isə bir qədər fərqlidi. “Blauqrana” 17,5 milyon avronu iki hissəyə bölərək ödəməyə razıdı. Ən əsası “Barsa” Ardanın daha bir il “Fənərbaxça”da icarədə oynayıb gələn yay komandaya qoşulmasının əleyhinə deyil. “Barselona” Gülərlə beşillik müqavilə imzalamaq istəyir. İspaniya mətbuatının yazdığına görə, türkiyəlinin təzminətı 1 milyard avroya bərabər olacaq! Ən son xəbərlərdə qeyd olunur ki, Arda “Fənər”ə daha çox pul qazandırmaq üçün “Barsa”dan 23 milyon avro tələb edib. İşi çətinləşdirən daha bir məqam futbolçunun atasının ən azı 10 milyon avro komissiya haqqı tələb etməsidi. Hələ ki bu yarışda “Barsa” ilə “Real”dan hansının öndə olduğunu söyləmək çətindi. Bir məqam dəqiqdi ki, Arda artıq bu söz-söhbətdən təngə gəlib və gələcəyinin müəyyənləşməsi üçün dünən sonuncu dəfə başqan Əli Koçla görüşməliydi.

Qeyd edək ki, “Fənərbaxça” artıq yeni mövsümün hazırlığına başlasa da, Arda məşqlərdə iştirak etmir. Sonda bir xəbəri də diqqətinizə çatdıraq. Türkiyəli həmkarlarımızın iddiasına görə, Ardanın Uelsə vurduğu qol FİFA tərəfindən 2023-cü ilin ən yaxşı qolu seçilməyə namizəd göstəriləcək. Hərçənd “Puşkaş” mükafatına namizəd olan qollar hələ rəsmi şəkildə açıqlanmayıb.

ƏLİ