Siyasət növbəti dəfə idmana qarışıb!

"Football-plus.az" xəbər verir ki, Ukrayna futbolunun flaqmanı Kiyev ''Dinamo''sunun rəsmi sosial səhifələrində olduqca sərt bəyanat paylaşılıb. Belə ki, ''Dinamo'' ''Zenit'' tərəfindən təşkil olunan ''Pari Premyer Kuboku''nda iştirak etmək üçün bu gün Rusiyaya yola düşən ''Fənərbaxça''nı tənqid atəşinə tutub. Bəyanatda ötən il İstanbulda baş tutan ''Fənərbaxça'' - ''Dinamo'' oyununda türkiyəli fanatların Rusiya prezidenti Vladimir Putinin lehinə təzahürat səsləndirməsi də xatırladılıb. ''Dinamo''nun bəyanatında bu sözlərə yer verilib: ''İstanbulda fanatlar bizim ölkənin qatilinin adını çəkəndə, oyuna Avropanın əsas sadistinin maskası ilə gələndə klubunuz susmuşdu. İndi bunun səbəbi tam aydın olur. ''Qazprom''un qanlı pulları hər şeyinizə, şərəfinizə və vicdanınıza kölgə saldı. Rus raketləri hər gün bizim vətəndaşları öldürür. Bütün mədəni dünya bu cinayətə qarşı birləşib. Siz isə terrorizmin sponsorundan qanlı sədəqələri qəbul edirsiz.

UEFA və FİFA Rusiya klublarını beynəlxalq turnirlərə buraxmadığı bir məqamda siz onlarla oynamaq üçün onların ölkəsinə gedirsiz. Bu rəzil addıma, davranışa, əxlaqsız qatillər üçün təşkil olunan səfərə heç cür bəraət qazandırmaq mümkün deyil. Ukrayna torpaqlarında qan axıtmaq üçün qatillərə yardım edirsiz. Əsrin ən böyük pisliyini dəstəkləmiş olursuz. ''Fənərbaxça İdman Klubu'' sizdə şərəf, utanmaq və vicdan adında şey yoxdu. Yazıqlar olsun sizə''. Xatırladaq ki, sözügedən turnirdə ''Zenit'' və ''Fənərbaxça''dan başqa təmsilçimiz ''Neftçi'' və Serbiya təmsilçisi ''Srvena Zvezda'' da iştirak edir.