''Fənərbaxça'' ilə Kiyev ''Dinamo''su arasında İstanbulda keçirilən oyunda yaşanan qalmaqal futbol dünyasında böyük ajiotaj doğurdu. 57-ci dəqiqədə Vitali Buyalskinin qolundan sonra ''Fənər''in bir qrup azarkeşi ''Vladimir Putin'' təzahüratını səsləndirməyə başladı. Düzdü, fanatların təxribatın qurbanı olduğunu da iddia etmək olar. Çünki Buyalski qoldan sonra onlara acıq verən hərəkətlər etdi və hətta buna görə sarı vərəqə də aldı. Bundan başqa, ''Dinamo''nin ehtiyat qapıçısı, daha öncə ''Beşiktaş''da da çıxış etmiş Denis Boyko da qola həddən artıq emosional şəkildə sevinməklə yerli fanatları qıcıqlandırdı. Bu tezahürat cəmi bir dəfə, o da 15-20 saniyə səsləndirilsə də, istənilən halda ''Fənər'' fanatlarına heç cür haqq qazandırmaq mümkün deyil. Rusiyanın Ukraynaya hərbi təcavüzünün davam etdiyi və az qala bütün dünyanın Rusiyadan üz döndərdiyi bir vaxtda türkiyəli azarkeşlərin bu addımı, gözlənildiyi kimi, ciddi qınaq obyektinə çevrildi.
UEFA dərhal məsələ ilə bağlı araşdırmanın başladığını açıqladı. ''Uyğunsuz davranış'' adlı 31-ci maddəyə əsasən İstanbul nəhənginə cəza veriləcəyi gözlənilir. Klubun rəsmi mövqeyi də özünü çox gözlətmədi. Rəsmi saytda yerləşdirilən bəyanatda ''Fənərbaxça''nın fevralın 24-də başlayan hərbi təcavüz zamanı dərhal öz mövqeyini ortaya qoyduğu və apreldə ''sülh üçün futbol'' şüarı altında ''Şaxtyor''la dostluq oyunu keçirdiyi xatırladıldı. Bundan başqa, həmin təzahüratın klubun duruşu və dəyərləri ilə üst-üstə düşmədiyi qeyd olundu. Eyni zamanda vurğulandı ki, bir neçə azarkeşin yol verdiyi hərəkətə görə bütün camiəni günahlandırmaq düzgün deyil. Bu hadisəni Ukraynanın Ankaradakı səfiri Vasili Bodnar ''Fənər'' fanatlarından bizim ölkəmizi bombalayan rus qatil və cinayətkara dəstək sözlərini eşitmək məni çox üzdü. Dost Türkiyə xalqına dəstəyi və həmin azarkeşlərə qarşı göstərdiyi etiraza görə təşəkkür edirəm'' sözləri ilə qınayıbsa, Krım Tatar Milli Məclisinin və Dünya Krım Tatar Konqresinin sədri Refat Çubarov da olaya münasibət bildirib. O, dil, mədəniyyət və inanc baxımından özünə yaxın olan ölkənin vətəndaşları tərəfindən bu cür hərəkətə yol verildiyi üçün utandığını bildirib. Bu arada dünən İstanbulda yaşayan Ukrayna vətəndaşları Beyoğluda toplaşaraq həmin təzahüratı səsləndirənlərə qarşı etiraz aksiyası keçiriblər. Onlar 2020-ci ildə Suriyada dünyasını dəyişən türk əsgərlərinin adlarını səsləndiriblər. Etirazçılar ''Fənərbaxça'' rəhbərliyinə müraciət də ünvanlayıb. Onlar həmin fanatların tapılmasını və bir daha stadiona buraxılmamasını istəyiblər.