Aylardı davam edən Emin Mahmudov dastanı bu gün “Neftçi” azarkeşləri üçün xoş sonluqla bitdi.

Bəli-bəli, ilk növbədə “Neftçi” azarkeşləri üçün! Kapitanın komandadan ayrılması ilə bağlı təhlükə yaranan kimi ağ-qara rənglərə könül verən adamlar sosial şəbəkələrdə rəhbərliyin üzərinə hücum etdi, nə yolla olur-olsun, onu saxlamağın zəruriliyindən danışmağa başladılar. Fəqət dəyərdimi?
Bu müddətdə Eminin adı Koreyadan tutmuş Türkiyəyə qədər ən müxtəlif ölkələrin klublarıyla yanaşı çəkildi. İndi paytaxt klubu ilə müqavilə müddətini uzatmaqla bağlı təbəddülatını belə izah edir ki, “özümü daha reytinqli və güclü çempionatda, fərqli atmosferdə sınamaq istəyirdim. Ona görə də yeni çağırışları dəyərləndirmək fikrinə düşdüm”. Amma “report”a verdiyi açıqlamanın ilk cümləsi də belədi: “Neftçi”yə sadiqəm. Bir dəfə “ağ-qaralı” olan həmişə “ağ-qaralı” qalır”.

“Neftçi” azarkeşlərini bilmirəm, şəxsən mənim Eminə inanmaq üçün zərrəcə əsasım yoxdu. Əksinə, belə düşünürəm ki, kapitan həm sevimli klubuna, həm də azarkeşlərə münasibətdə qeyri-etik və qeyri-səmimi davrandı. Söhbət “Neftçi”ni son mövsümdə heç bir hədəfinə çatdıra, yığmanı isə yumşaq desəm, çiynində apara bilməyən kapitandan gedir. Öz aramızdı, iyunun 3-də - “doğma divarlar” arasında “Qəbələ”yə uduzmaq nə idi? Sualı bir qədər də sərt qoyacam: Emin o oyunun harasındaydı? Məhz kubokun finalındakı fiaskodan sonra Eminin ağ-qara rənglərə vəfa borcu var idi. Amma o borcu qaytarmağı yox, daha çox qazanmağı düşündü. Bazarlıq etdi, etdi və nəhayət, hədəfinə yetd! “Neftçi”nin prezidenti Kamran Quliyevin də ifadə etdiyi kimi, bu yaşda, yəni 32-nin içində ölkənin ən ödənişli üç futbolçusundan biri oldu.

Allaha and olsun ki, Eminin pulunda zərrəcə gözüm yoxdu, nə vaxtsa üz-üzə gəlməyimiz, onun mənim üçün “hesab bağlaması” da mümkün deyil. Amma hər şeyi öz adı ilə çağırmaq lazımdı. Qardaş, “Neftçi”də qalacaqdınsa, toplanışın 15 gününü niyə boşa verdin? “Neftçi”yə “Zenit”lə çətin oyunda niyə yardım etmədin? “Neftçi” sabah, Allah eləməmiş, Konfrans Liqasında “Dinamo” – “Jelezniçar” cütünün qalibinə uduzsa, həmin uğursuzluğun məsuliyyəti kimin boynunda olacaq?

Dünən-srağagün Qusarda at sürən, bu gün isə artıq Sankt-Peterburqda olan Eminin iştahına baxın: “Çatan kimi məşqlərə start verəcəm. Ümid edirəm ki, qarşıdakı “Srvena Zvezda” ilə oyunda meydana çıxıb komanda yoldaşlarıma kömək edəcəm”.
Prinsipcə elə burda yazıya nöqtə qoymaq olardı. Amma şəxsən mən “Neftçi”nin məşqçilərinin yerində olsaydım, Emini nə “Srvena Zvezda” ilə oyuna buraxar, nə də “Neftçi”nin kapitan sarğısını ona verərdim. Adam sarğıya həsrət qalarsa, onun dəyərini anlayacaq. Və görünür, üzü üzlər görmüş Berti Foqtsun da bildiyi çox şey var imiş. O deyirdi ki, komandaya müdafiə əməliyyatlarında yardım etməyən futbolçunun, yəni Eminin mənim komandamda nə işi var? Gözün aydın, herr Berti, Emin böyüdü-böyüdü, ayyarım bazarlıq etdi və bir gün ayıldı ki, futbolda vəfa, sədaqət anlayışları, ağ-qara rənglər var imiş. Nə bilim, vallah...

ORXAN