"Neftçi"nin yeni transferi Solomon Kvirkveliya klub telekanalına geniş və maraqlı açıqlama verib: “Neftçi” çox yaxşı, tarixi klubdu. Bu klub haqda çox şey bilirəm və eşitmişəm. “Neftçi”nin futbolçusu olmaq şansım yarananda bir an belə düşünmədim, dedim ki, “mən hazıram”. Mənə zəng vurub, 2 illik müqavilə ilə bağlı, demək olar ki, razılığa gələndə mən dərhal evdə əşyalarımı toplayıb tibbi müayinə üçün Antalyaya uçdum. Çox istəyirdim ki, “Neftçi”nin futbolçusu olum. Çünki bu, tarixi olan çox güclü klubdu, müntəzəm avrokuboklarda çıxış edir və Azərbaycan çempionluğu uğrunda mübarizə aparır. Buna görə də müqavilə bağlayıb-bağlamamaq haqda düşünməyə və ya tərəddüd etməyə bir səbəb yox idi. Harda oynayıramsa, həmişə maksimum hədəflərim olur. Yenə deyirəm, bu komanda yüksək səviyyədədi və çox yaxşı futbolçuları var. Bütün futbolçular çox yaxşı başa düşürlər ki, burda yalnız birinci yer uğrunda mübarizə aparmaq lazımdı. Uyğunlaşma prosesi mənim üçün çox asan oldu. Çoxdan tanıdığım kapitanımız Emin Mahmudov məni komandaya çox gözəl qəbul etdi. Rusiyada uzun illər qarşı-qarşıya oynadığım uşaqlar var. Belə bir hissiyyatım var, sanki azı 2 ildi burdayam. Toplanış əla gedir. Bu belə də olmalıdı. Biz məşq edirik. Ən əsası odu ki, bütün futbolçular sağlamdı və yükləmələrdən sonra hamı özünü yaxşı hiss edir. Artıq iki yoldaşlıq oyunu keçirmişik. İlk matç mənim üçün çətin oldu. Bəlkə çox da çətin olmadı, amma ikinci oyundakı kimi rahat deyildi. Gündən-günə, oyundan-oyuna forma yığırıq və özümüzü daha da yaxşı hiss edirik. Məşqçimiz şəxsən mənim üçün həm məşqçi, həm də bir insan kimi çox yaxşıdı. Mən bura gələndə o mənə çox dəstək oldu. Dedi ki, məşqdə nəsə alınmasa, məni həmişə dəstəkləyəcək. Mənim də onun dəstəyinə ehtiyacım var idi. Bunun üçün ona minnətdaram və hər gün daha yaxşı məşq edib özümü göstərməyə hazıram. Bilirəm ki, klubumuzun çox yaxşı azarkeşləri var. Müqavilə bağlamağım haqda söz-söhbət yarananda onlar mənə çox yazırdılar. Hardasa 1000-1500 mesaj yazıb soruşurdular ki, bu doğrudumu? Amma o vaxt rəsmi müqavilə imzalamamışdım deyə, onlara cavab verə bilmirdim. Azarkeşlərdən hiss etdiklərimə, kluba keçidimdən məmnun olduqlarına görə onlara təşəkkür edirəm”.