Ötən tur turnir cədvəlində ən yaxın izləyici “Zirə”yə qalib gələn “Neftçi”də üzlər gülür. Başqa cür ola da bilməz. 20-ci oyun həftəsində “Sabah”a uduzan komandanın “qartallar” üzərində qələbəsi istər klub rəhbərliyinin, istərsə də azarkeşlərin yarasına müəyyən qədər məlhəm olub.

Azarkeşlərdən söz düşmüşkən, qəsəbə təmilçisi ilə görüşdə “Neftçimaniya” fanklubun üzvləri “Neftçi”ni tərk elə, Mahmudov, Mahmudov” şüarını səslənidiriblər ki, bunun səbəbi var. 2023-cü ilin yayında “ağ-qaralar”ın kapitanının klubla müqaviləsinin müddəti başa çatacaq, amma Mahmudov hələ ki rəhbərliklə danışıqlar masası arxasına oturmağa tələsmir. Komandanın liderinin adı son vaxtlar “Qarabağ” və “Sabah” ilə yanaşı hallanır. Söylənilənlərə inansaq, istər “köhlən atlar”, istərsə də “bayquşlar” Eminə daha yaxşı şərtlərlə müqavilə təklif edir. Məhz bu səbəbdən “Neftçi”nin azarkeşləri onun ünvanına heç də xoş olmayan şüarlar səsləndirir.

Ancaq dünən etibarlı mənbədən əldə etdiyimiz məlumat “Neftçi” azarkeşlərinin ürəyincə olacaq. Kluba yaxın mənbədən əldə etdiyimiz bilgiyə əsasən, yaxın günlərdə komandanın kapitanı ilə yeni anlaşma imzalanacaq. Mənbəmizin sözlərinə inansaq, ikiillik müqavilədə Eminin maaşının artırılması nəzərdə tutulub.

RƏŞAD / Football-plus.az