“Qalatasaray”lıların Mauro İkardidən xəbər gözləyə-gözləyə tədricən gözlərinin kökü saralmağa başlayır.

"Football-plus.az" xəbər verir ki, argentinalı forvard birillik İstanbul macərasında icarə əsasında oynamasına baxmayaraq, elə performans ortaya qoydu ki, fanatlar hücumda ondan başqa heç kimi görmək istəmir. Amma “Zoluşka” cizgi filminin baş qəhrəmanı gecə saat 12 olmamış məclisi tərk etmək məcburiyyətində qaldığı kimi İkardi də icarə müddəti başa çatrdığı üçün iyulun 1-dən yenidən PSJ-nin oyunçusuna çevrildi.

“Qalatasaray” rəhbərliyi yenidən onu komandaya qazandırmaq üçün əlindən gələni edir. İlk baxışdan bu, çətin olmamalı idi. Çünki 30 yaşlı futbolçunun PSJ ilə cəmi birillik müqaviləsi qalıb. Üstəlik parislilər onun xidmətində maraqlı deyil. Amma Avropanın transfer bazarında aləmi bir-birinə vuran Səudiyyə Ərəbistanı təmsilçiləri bu məsələdə də vəziyyətin qəlizləşməsinə səbəb oldular. Məsələ burasındadı ki, “Əl-Tavun” İkardiyə illik 25 milyon avro maaş təklif edib! “Qalatasaray” isə bu astronomik məbləğin heç yarısını da İkardiyə təklif edə bilmir. Bu məsələdə İstanbul nəhənginin əlini-qolunu gücləndirən yeganə məqam odu ki, İkardi Səudiyyə Ərəbistanına yollanmağa can atmır və Avropada qalmaq istəyir. Ünlü futbolçunun “Qalatasaray”dan tələbləri bəlli olub. İkardinin meneceri və həyat yoldaşı Vanda Nara “Cim-Bom”dan illik ən azı 10 milyon avro məvacib və üçillik müqavilə tələb edib. Yəni təkcə maaş kimi İkardi Türkiyədə 3 ilə 30 milyon avro qazanmaq istəyir. Maraq üçün bildirək ki, ötən mövsüm İkardinin maaşı 9 milyon avro idi. Kağız üzərində “Qalatasaray” bu pulun yalnız 750 min avrosunu ödəyirdi... “Qalatasaray”ın rəsmisi Ərdən Timur məbləği mümkün qədər aşağı salmağa şalışır. Çünki tək 10 milyon avro ilə iş bitmir. Vanda Nara bu puldan əlavə bonuslar və imichaqqı kimi 2,5 milyon avro da istəyir. Bura PSJ-yə ödəniləcək təzminatı da əlavə etsək, məsələ “Qalatasaray” üçün sonu görünməyən bir yola bənzəyir. Danışıqlar prosesi davam edir. Bununla yanaşı, rəhbərlik sponsor axtarışını da davam etdirir. Tərəflər lap 10 milyon avroya anlaşsa belə, “sarı-qırmızılar” bu pulun uzaqbaşı 6 milyon avrosunu ödəmək iqtidarındadı. Qalan məbləğ isə sponsorların hesabına ödəniləcək.

Xatırladaq ki, “Qalatasaray”ın Çempionlar Liqasında 2-ci təsnifat mərhələsi çərçivəsində keçirəcəyi ilk oyuna cəmi 3 həftə qalıb. Heyətdə isə hələ də hücumçu yoxdu...

ƏLİ