“Oyunlar maraqlı alındı. Kiçik çatışmazlıqlardan başqa narazı qaldığım məqam yoxdu. Hazırlıq matçları yeni futbolçuların sınaqdan keçirilməsi baxımından da əhəmiyyətli oldu. Həm Gürcüstan, həm də Rusiya azərbaycanlıları arasından seçdiyimiz potensiallı gəncləri heyətə cəlb etmişik. İki qarşılaşmada onların nəyə qadir olduqalarını gördük və təhlil etdik. Hər bir futbolçu meydanda özünü yaxşı tərəfdən göstərməyi bacardı. İlk oyunda hesab açılmasa da, meydanda üstünlüyümüzü qoruya bildik. Rəqibdən daha çox topa sahib olduq. Futbolçular fəal idi, qaneedici təsir bağışladılar. İkinci qarşılaşmada isə meydanı məğlub tərk etdik. Qələbə istəsəydik, təcrübəli və formalaşmış heyətlə çıxış edərdik. Bu isə digər futbolçuların inkişaf dinamikasına mənfi təsir edərdi. Milliyə daha çox oyunçu qazandırmaq üçün çalışırıq. Əsas odu ki, yeni qapıçı və müdafiəçilərimizi yoxlama oyunlarına cəlb edib çatışmazlıqlarını və üstünlüklərini dəyərləndirə bildik”.

“Növbəti il Avropa çempionatının seçmə mərhələsinə qatılmağı planlaşdırırıq. Bu səbəbdən yoxlama görüşlərində nəticə üçün oynamırıq. Əsas məqsədimiz komandanın hərtərəfli inkişafını təmin etməkdi. Yeri gəlmişkən, indiki gənclərin fiziki hazırlığı çox aşağıdı. İki gün fasilə ilə baş tutan qarşılaşmalarda güc balansını qoruya bilmirlər. Növbəti matçın 60-70-ci dəqiqəsindən sonra yorulurlar. Bu da qitə miqyasında çıxış edərkən problem yaradır. Təəssüf ki, bununla bağlı tədbir görmək üçün yetərincə vaxt olmur. Onlar məşqlərdən əlavə öz üzərində işləməlidi. Ümumiyyətlə, millimizin müəyyən təcrübəsi var. Bunu dəyərləndirmək və inkişaf etdirmək üçün çalışırıq”.