''Fənərbaxça''da hazırda bəlkə də yeni baş məşqçi və yeni transferlerdən daha çox gündəmdə olan başqa bir məsələ var.

"Football-plus.az" xəbər verir ki, söhbət gənc ulduz Arda Gülərin komandada qalıb-qalmayacağından gedir.

Ən son Türkiyə yığmasının heyətində Uelsə mükəmməl qol vurmaqla populyarlığını bir qədər də artıran Ardaya Avropanın önəmli klubları ciddi maraq göstərməkdə davam edir. Özü də bu klubların başında ''Real'' gəlir!

18 yaşlı yarımmüdafiəçinin ''Fənər''lə 2025-ə qədər müqaviləsi olsa da, təzminatı cəmi 17,5 milyon avrodu. Bu məbləği ödəmək Avropa nəhəngləri və ''Real'' üçün problem yaratmır. ''Fənər'' rəhbərliyi var gücü ilə Ardanın komandada ən azı daha 1 mövsüm qalmasına çalışır. Başqan Əli Koç son 10 gündə Ardanın valideynləri ilə 2 dəfə görüşsə də, heç bir nəticə əldə olunmadı.

''Real''a çətinlik yaradan əsas məqam odu ki, türkiyəli ulduz daimi oyun praktikası tələb edir. Amma Ardanın Madrid nəhəngində daim startda oynaması real görsənmir. Ona görə də ''blankos''un iki seçim imkanı var: ya Ardanı alıb ikinci komanda sayılan ''Kastilya''ya göndərmək, ya da lazımi oyun praktikası və təcrübəsi toplaması üçün ''Fənər''in özünə birillik icarəyə vermək.

''Real''dan başqa Gülərə ''Barselona'', Dortmund ''Borussiya''sı, ''Leyptsiq'', ''Sevilya'', ''Ayaks'' və ''Benfika'' da maraq göstərir. Bu arada Avropa mətbuatında Ardanın atasının klublardan astronomik məbləğdə komissiya haqqı tələb etməsi barədə xəbərlər peyda olub. Deyilənə görə Ümit Gülər oğluna maraq göstərən klublardan 20 milyon avro tələb edir!

Xüsusilə Portuqaliya mətbuatı bu məqama böyük yer ayırıb. ''A Bola'' nəşri ''türkiyəli ulduz üçün tələb olunan komissiya haqqı transfer qiymətindən çoxdu'' başlıqlı yazı dərc edib. Yazıda Ardanın atası tanınmış mərhum menecer Mino Rayolaya bəzədilib. Rayola da danışıqlar prosesi zamanı tez-tez özü üçün astronomik məbləğlər tələb edirdi. ''Record'' nəşri də futbolçunun atasının bu ''bacarığından'' gileylənib. Amma Arda ilə bağlı indi hər ağızdan bir söz çıxır. Ona görə bilmirsən, kimə inanasan. Məsələn, Türkiyə mətbuatı iddia edir ki, Ardanın atasının pulgir olması barədə şaiyələri bəzi menecerlər qəsdən yayıblar. Söhbət ötən mövsümün gedişində futbolçuya və onun ailəsinə şirin vədlər verən, amma istəyinə çata bilməyən menecerlərdən gedir.

2022/23-ün gedişində Ardanın ''Fənər''lə müqaviləsində mühüm bir maddə var idi. Onun müqavilə müddətinin avtomatik 2025-ə qədər uzadılması üçün futbolçu bütün rəsmi oyunlarda ümumilikdə 1500 dəqiqə meydanda olmalı idi. Əks təqdirdə bu yay başqa klublar onu cəmi 5 milyon avroya transfer edə biləcəkdi.

İkinci dövrədə bəzi menecerlər Ardanın valideynlərinə 5 milyon avro təklif etmişdilər. Onlar istəyirdilər ki, Arda özünü zədəli göstərib oyunlara çıxmasın və 1500 dəqiqə şərti həyata keçməsin. Amma Ardanın atası bundan imtina etmişdi. İndi də həmin vaxt istəyinə çata bilməyən menecerlər yalandan Ümit Gülərin pulgir olması barədə şaiyələr yayırlar.