“Samsunspor”un prezidenti fransızlardan cavab gözləyir
Superliqanın debütantı, 1-ci liqada çempion olaraq 11 illik fasilədən sonra elitada oynamaq haqqı qazanan “Samsunspor”un prezidenti Yüksəl Yıldırımın Fransada bir klubu satın almaq istədiyi barədə məlumat vermişdik.
"Football-plus.az" xəbər verir ki, “Samsunspor”la sıx əlaqədə ola biləcək, oyunçu dəyişdirə biləcək bir klub axtaran 62 yaşlı Yıldırım “Dankerk” adlı kluba göz qoyub. Eyniadlı şəhəri təmsil edən bu klub son mövsümü Fransanın 3-cü divizionunda keçirsə də, 2-ci pilləni tutaraq Liqa-2-də oynamağa haqq qazanıb. Yüksəl Yıldırım yeni klub almaq ideyası barədə danışaraq fransızlardan cavab gözlədiyini bildirib:
“Dankerk rəhbərliyi ilə 4 aydı danışıq aparıram. Artıq danışıqlar prosesi yekunlaşmaq üzrədi. Son təklifimi onlara bildirmişəm və cavab gözləyirəm. Fikrimcə, ən gec gələn həftə bu iş bitəcək. Əslində Fransada ən birinci “Valensyenn” rəsmiləri ilə görüşüm oldu. Amma maddi məsələlərdə anlaşa bilməyəcəyimizi anladım. Liqa-2-dən bir komandanı satın almağın çətin olacağını gördüyüm üçün 3-cü diviziona diqqətimi yönəltdim. “Dankerk” yaxşı mövsüm keçirirdi və dərhal diqqətimi cəlb etdi. İlk gündən etibarən bu işin mümkün ola biləcəyini anladım. Klubun maddi durumundan tutmuş şəraitinə qədər bütün detalları incələdik. Bizə uyğun klub olduğunu gördük. Dediyim kimi onların cavabını gözləyirəm. Məqsədim Samsundan xaricə, xaricdən də Samsuna oyunçu alış-verişini həyata keçirə biləcəyim bir klub tapmaqdı. Fransadan başqa Portuqaliya, Kolumbiya və Balkan ölkələrinin klubları da ilə də maraqlanmışam. O ölkələrdə klubların özünü və “altyapı”sını araşdırmışam. Zatən tələsən bir yerim yoxdu. Şərtlər uyğun olsa, o ölkələrin birindən də klub almağım mümkündü. Əslində Türkiyənin özündən də klub almaq ideyası beynimdən keçib. 1-ci liqada oynayan, azarkeş sayı çox olmayan, camiənin təzyiqini hiss etməyən bir klub almaq hədəfim var idi. Həmin klubun superliqaya yüksəlmək hədəfinin olmasını istəmirdim. Yəni daim 1-ci liqada oynamasını istəyirdim. “Samsunspor”da heyətə və iştirak ərizəsinə düşə blməyən futbolçuları oyun praktikasından əziyyət çəkməmələri üçün həmin kluba göndərmək yaxşı olardı. Bəzi klublarla təmaslarımız oldu. Amma biri çox pul istədi. Digəri isə 2-ci liqaya yuvarlandığı üçün danışıqlar dayandı. Belə görünür, Türkiyədən klub almaq layihəsini bir müddət təxirə salmalı olacam”.
Bu arada “Qalatasaray” prezidenti Dursun Özbəkin də Avropada bir klubu satın almaq üçün danışıqlar apardığı iddia edilir. Bolqarıstan mətbuatının yazdığına görə, Özbək Sofiya təmsilçisi “Levski”nin hissələrini almaq üçün klubun sahibi Nasko Sirakov ilə danışıqlar aparır.
Digər xəbərlər
