Türkiyənin 2-ci liqası, yəni 3-cü divizionunda çıxış edən ''Çorum''da çox maraqlı və qəribə bir hadisə baş verib.

"Football-plus.az" xəbər verir ki, uzun müddətdi yeni prezident axtarışında olan klubu öz futbolçusu və kapitanı Murat Yıldırım satın alıb! Daha öncə uzun illər superliqada çıxış edən və ''Bursaspor'', ''Ərciyəsspor'', ''Yeni Malatyaspor'', ''Gənclərbirliyi''nin şərəfini qoruyan 35 yaşlı yarımmüdafiəçi ötən yay ''Çorum''un təklifini qəbul etmişdi.

3-cü divizionda mövsüm mayın 7-də başa çatdıqdan sonra o, doğulduğu Niderlanda yollanmışdı. Dünən Niderlanddan Türkiyəyə gələn və sənədlərə qol çəkən Murat Yıldırım bundan sonra klubun oynayan prezidenti vəzifəsini daşıyacaq. Bu sövdələşmənin ona hansı məbləğə başa gəldiyi barədə məlumat verilmir. Yanvarda ''Çorum''un ''Fənərbaxça''nın dünya səviyyəli ulduzu Məsut Özil tərəfindən satın alınacağı barədə şayiələr yayılmışdı. O vaxt mətbuatda Məsutun 1,3 milyon avro ödəyəcəyi və ona bu işdə yaxın dostu, komanda yoldaşı, əslən çorumlu olan İrfan Can Kahvecinin yardım edəcəyi deyilmişdi. Amma sonradan bu söz-söhbət öz təsdiqini tapmadı. Qeyd edək ki, ''Çorum'' son mövsümü 7-ci pillədə bitirərək pley-off zonasından, yəni ilk ''6-lıq''dan kənar qaldı. Amma klubun superliqa səviyyəsində yeni bazası və stadionu var.